ސައިބާ ހަމަލާތަކުން ރައްކާތެރިވުމުގެ ގާބިލުކަން ގައުމީ ފެންވަރުގައި ގާއިމުކުރަން ޖެހޭ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.
ފުލުހުންނާއި ނެޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އިން ގުޅިގެން އަންނަގެ 10-13 އަށް ބާއްވަން ހަމަޖެހިފައިވާ ސައިބަ އެކްސްޕޯ 2024" ގެ ވެބްސައިޓް ލޯންޗްކުރަން ރޭ ބޭއްވި ރަސްމިއްޔާތުގައި މިނިސްޓަރު ވިދާޅުވީ ރާއްޖޭގައި ފުރަތަމަ ފަހަރަށް ސައިބާ ސެކިއުރިޓީ ހަރަކާތެއް ފުލުހުންނާއި ކަމާގުޅޭ މުއައްސަސާތައް ގުޅިގެން ކުރިއަށްގެންދާކަމީ ރާއްޖޭގައި އެ ދާއިރާގެ އިސްވެރީން މި މިކަންކަމާ ދޭތެރޭގައި ވިސްނުން ބަހައްޓަވާ މިންވަރު ހާމަވާ ކަމެއް ކަމަށެވެ.
އިހުސާން ވިދާޅުވީ މި ސަރުކާރު ވެރިކަމަށް އައި އިރު، ދައުލަތުގ އެކި އިދާރާތަކާއި އަމިއްލަ ވިޔަފާރިތަކަށް ދޭތެރެ ދޭތެރެއިން ސައިބަ އެޓޭކްތައް ދެމުން އައި ކަމަށާއި މިހާރު ރާއްޖޭގެ ސައިބާ ސްޕޭސް އޮތް ގޮތް ދިވެހީން ވަޒަންކުރަން ޖެހޭ ކަމަށެވެ.
އެގޮތުން ތަފާސްހިސާބަށް ބަލާއިރު މިދިޔަ އަހަރާ އަޅައިބަލާ އިރު މި އަހަރު ސައިބާ ހަމަލާތައް 31 ޕަސެންޓް އިތުރުވެފައިވާ ކަމަށް ވެސް މިނިސްޓަރު ވިދާޅުވި އެވެ. އަދި އަންނަ އަހަރަށް ލަފާކުރާ ގޮތަށް ބަލާއިރު މީގެން ކޮންމެ ރެންސަމްވެއާ އެޓޭކެއްގެ އެވްރެޖް ވެލިއުއަކީ 200،000 ޑޮލަރު ކަމަށް ވިދާޅުވި އެވެ.
"އެހެންވެ "އަޅުގަނޑުމެންގެ އެންމަވަޔަރަމަންޓް ޙިމާޔަތް ކުރުމަކީ ހަމައެކަނި ވަކި އިދާރާއެއްގެ ނުވަތަ ކުންފުންޏެއްގެ ޒިންމާއެއްގެ ތެރޭގައި ހިމެނޭކަމެއް ނޫން،" އިހުސާން ވިދާޅުވި އެވެ. "އޭގެ އިތުރަށް އެއީ ޤައުމީ ފެންވަރުގައި މުޅި ސައިބަރ ސްޕޭސް މެނޭޖްކޮށް، ސައިބަރ ސްޕޭސް މެދުވެރިކޮށް އަންނަމުންދާ ނުރައްކަލަށް އަޅުގަނޑުމެންގެ ޑިފެންސް ޤާއިމުކޮށް އެކަމަށް ޤާބިލުވާން ޖެހޭ."
އޭނަ ވިދާޅުވީ ސައިބަ ސްޕޭސް މިހާރު ވަރަށް ބޮޑަށް ފުޅާވެ، އެކަން ދިރިއުޅުމުގައި ވަރަށް ބޮޑަށް ވަކިހިއްޕާފައި އޮތް ކަމަށެވެ.