އިކްއެޑޯގެ ޒުވާން ފުޓްބޯޅަ ތަރި މާކޯ އެންގްލޯ އުމުރުން 22 އަހަރުގައި މަރުވެއްޖެ އެވެ.
ކުރިއަރަމުން ހުނަރުވެރި މިޑްފީލްޑަރުގެ މަރާ ގުޅިގެން އިކްއެޑޯގެ ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނީ މާކޯގެ ކުއްލި ވަކިވުމަކީ ވަރަށް ބޮޑު ހިތާމައެއް ކަމަށާއި މިއީ އެ ގައުމުގެ ފުޓްބޯޅައަށާއި ފުޓްބޯޅަ އަށް ލޯބިކުރާ އެތައް ބަޔަކަށް ލިބުނު ވަރަށް ބޮޑު ދެރައެއް ކަމަށެވެ.
މާކޯ މި މަހުގެ 11 ވަނަ ދުވަހު މަރުވީ މިދިޔަ މަހުގެ 7 ގައި ހިނގި ކާރު އެކްސިޑެންޓެއްގައި ލިބުނު އަނިޔާތަކަށް ހޮސްޕިޓަލްގެ އައިސީޔޫގައި ފަރުވާ ދެމުން ދަނިކޮށެވެ. އެ އެކްސިޑެންޓްގައި އޭނަގެ ބޮލަށް ސީރިއަސް ގެއްލުންތަކެއް ލިބުމުގެ އިތުރަށް ފުއްޕާމެއަށް ވެސް ވަރަށް ބޮޑަށް ގެއްލުންވި އެވެ.
އޭނަގެ މަރާ ގުޅިގެން އެންމެ ފަހުން ކުޅުނު އިކްއެޑޯގެ ކުލަބް، އެލްޑީޔޫ ކުއިޓޯ އިން ވެސް ހިތާމަފާޅުކޮށް، ޓީމަށް ގެއްލިގެން ދިޔައީ ވަރަށް މުހިއްމު ބައިވެރިއެއް ކަމަށް ބުނެފައިވެ އެވެ.
މާކޯގެ ކެރިއަރުގައި ބައިނަލްއަގްވާމީ 11 މެޗް ކުޅެފައިވެ އެވެ. އޭގެ ތެރޭގައި 17 އަހަރުން ދަށުން ގައުމީ ޓީމަށް ކުޅުނު ހެތް މެޗަތާއި 20 އަހަރުން ދަށުގެ ޓީމަށް ކުޅުނު 2 މެޗެއް ހިމެނެ އެވެ.