ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި ބޮލީވުޑްގެ ފިލްމު "އެއިތުރާޒް" ގެ ދެވަނަ ބައެއް ހަދަން އިއުލާންކޮށްފި އެވެ.
މީގެ 20 އަހަރު ކުރިން ނޮވެމްބަރު 12 ގައި ރިލީޒްކުރި ފިލްމުގެ ދެވަނަ ބައެއް ހަދަން ނިންމިކަން އިއުލާންކުރީ އެ ފިލްމު އުފެއްދި ޕްރޮޑިއުސަރު ސުބާޝް ގާއީ އެވެ. އޭނަ މިއަދު ސޯޝަލް މީޑިއާ ޕޯސްޓެއްގައި ބުނީ "އެއިތުރާޒް 2" ގެ ސްކްރިޕްޓަކީ ތިން އަހަރު ދުވަހުގެ ވަރަށް ބުރަ މަސައްކަތެއް ކަމަށެވެ.
އެހެންވެ މިއާ ބެހޭ އިތުރު މައުލޫމާތަށް އިންތިޒާރު ކުރަން ވެސް އެދިފައިވެ އެވެ.
ގާއީގެ ޕޯސްޓްގައި "އެއިތުރާޒް" ގައި ނެގަޓިވް ރޯލެއް ކުޅެގެން ފިލްމުފެއާގެ އެންމެ މޮޅު ވިލަންގެ އެވޯޑް ވެސް ހޯދި ޕްރިޔަންކާ ޗޯޕްޅާ ފިލްމުގައި ކުޅުނު "ބޯލްޑް" ކެރެކްޓާ އަށް ތައުރީފު ވެސް ކޮށްފައިވެ އެވެ.
ދެހާސް ހަތަރެއްގައި ރިލީޒްކުރި "އެއިތުރާޒް" ގެ ލީޑް ކާސްޓްގައި ހިމެނެނީ ޕްރިޔަންކާގެ އިތުރުން އަކްޝޭ ކުމާރާއި ކަރީނާ ކަޕޫރެވެ. އައްބާސް-މަސްތާން ޑައިރެކްޓްކުރި މި ރޮމޭންޓިކް ތުރިލާގެ ކާސްޓްގައި އަމްރިޝް ޕޫރީ އާއި ޕަރޭޝް ރާވަލް އަދި އައްނޫ ކަޕޫރް ވެސް ހިމެނެ އެވެ.
އެންމެ 8 ކްރޯޑް ރުޕީސް (947,200 ޑޮލަރު) ގެ ބަޖެޓަކުން ހެދި "އެއިތުރާޒް" އަށް ބޮކްސް އޮފީހުގައި 94 މިލިއަން ޑޮލަރު (11.1 މިލިއަން ޑޮލަރު) ގެ އާމްދަނީއެއް ލިބުނެވެ.