ވާހަކަ ލިޔުންތެރިންނަށް ދެވޭ އެންމެ ޝަރަފުވެރި އެވޯޑްތަކުގެ ތެރޭގައި ހިމެނޭ "ބުކާ ޕްރައިޒް" މި އަހަރު އިނގިރޭސިވިލާތުގެ ލިޔުންތެރިޔާ ސަމަންތާ ހާވީ އަށް ލިބިއްޖެ އެވެ.
އޭނަ އަށް އެވޯޑް ލިބުނު ވާހަކަ އަކީ ޖައްވީ ހާދިސާތަކެއް ގެނެސްދީފައިވާ އަދި އާންމުންގެ މެދުގައި ވަރަށް ބޮޑު މަގުބޫލު ކަމެއް ހޯދި "އޯބިޓަލް" އެވެ. މީގައި ކިޔައި ދެނީ އިންޓަނޭޝަނަލް (ސްޕޭސް ސްޓޭޝަން އައިއެސްއެސް) އަށް ދާ އެންޓްރޮނޯޓުންގެ ޖައްވުގައި ކުރާ ތަޖުރިބާތަކެއްގެ ވާހަކަ އެވެ.
"އޯބިޓަލް" އަށް މި އަހަރު ލިބުނު "ބުކާ ޕްރައިޒް" އާ އެކީ ސަމަންތާ ވެގެން ދިޔައީ 2019 ގެ ފަހުން އެ އެވޯޑް ލިބުނު ފުރަތަމަ އަންހެން ލިޔުންތެރިޔާއަށެވެ. އެވޯޑާ އެކީ ފައިސާގެ ގޮތުގައި 50،000 ޕައުންޑް ވެސް ލިބިފައިވެ އެވެ.
"އޯބިޓަލް" އާ އެކު މި އަހަރުގެ "ބުކާ ޕްރައިޒް" އަށް އިތުރު ފަސް ފޮތެއް ވާދަކުރި އެވެ. އެއީ އެމެރިކާގެ ލިޔުންތެރިޔާ ޕާސިވަލް އެވަރެޓްގެ "ޖޭމްސް" އާއި އެ ގައުމުގެ ލިޔުންތެރިޔާ ރެޗެލް ކުޝްނާގެ "ކްރިއޭޝަން ލޭކް" އާއި ކެނެޑާގެ ލިޔުންތެރިޔާ އޭން މިކަލްސްގެ "ހެލްޑް" އާއި ނެދަލޭންޑްސްގެ ލިޔުންތެރިޔާ ޔެއެލް ވެން ޑާ ވޫޑެންގެ "ދަ ސޭފްކީޕް" ގެ އިތުރުން އޮސްޓްރޭލިއާގެ ލިޔުންތެރިޔާ ޝާލޮޓްގެ ވުޑްގެ "ސްޓޯން ޔާޑް ޑިވޯޝަން" އެވެ.
"ބުކާ ޕްރައިޒް" ގެ 55 އަހަރުގެ ތާރީހުގައި މި އަހަރަކީ އަންހެން ލިޔުންތެރިންތަކެއް އެންމެ ގިނަ އިން ނޮމިނޭޓްވި އަހަރެވެ. އެގޮތުން ނޮމިނޭޓްވި ހަ ވާހަކައިގެ ތެރެއިން ފަސް ފޮތް ލިޔުނީ އަންހެން ލިޔުންތެރިންނެވެ.