ސިޔާސީ ޕާޓީތައް 100،000ރ. އިން ޖޫރިމަނާ ކުރެވޭ ގޮތަށް ސިޔާސީ ޕާޓީތަކުގެ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފި އެވެ.
ގާނޫނަށް މި އިސްލާހު ހުށަހެޅުއްވީ ސަރުކާރުގެ ފަރާތުން ދިއްދޫ ދާއިރާގެ މެންބަރު ޢަބްދުއްލަޠީފް މުޙައްމަދު އެވެ.
މި ބިލު މަޖިލީހުން ފާސްކޮށްފައި ވަނީ 61 މެންބަރުންގެ ވޯޓުންނެވެ. އިދިކޮޅު އެމްޑީޕީއަށް ނިސްބަތްވެވަޑައިގަންނަވާ 10 މެންބަރުން ވަނީ ބިލާ ދެކޮޅަށް ވޯޓް ދެއްވާފަ އެވެ.
ބިލުގައިވާ ގޮތުން ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފި ނަމަ، އެ މީހަކު ޖޫރިމަނާ ކުރުމުގެ އިތުރުން، އެ މީހަކު ނިސްބަތްވާ ޕާޓީ 100،000ރ. އިން ޖޫރިމަނާ ކުރެވޭނެ އެވެ. މީގެކުރިން އޮންނަ ގޮތުން ސިޔާސީ ޕާޓީއަކަށް ނިސްބަތްވާ މީހަކު ގާނޫނާ ހިލާފު ކަމެއް ކޮށްފިނަމަ 30،000ރ. އާއި 75،000ރ. އާ ދެމެދުގެ އަދަދަކުން ޖޫރިމަނާ ކުރެވޭނީ އެ މީހެކެވެ.
ބިލުގައި އިތުރަށް ހިމަނާފައި ވަނީ، ޕާޓީއެއް އުވާލައިފިނަމަ، އެ ޕާޓީގެ ނަމާއި ނިޝާނާއި ސިއްކަ އާއި ކުލަ ފަދަ ޕާޓީ ރަމްޒުކޮށްދޭ ތަކެތި ޕާޓީ އުވާލާތާ ފަސް އަހަރު ނުވާ ނަމަ ބޭނުން ނުކުރެވޭނެ ކަމަށެވެ. އަދި ފަސް އަހަރަކުން އެއް ފަހަރު ގައުމީ ބައްދަލުވުމެއް ނުބޭއްވިޔަސް ޕާޓީ އުވާނުލެވޭނެ ކަމަށް ވެސް ބިލުގައިވެ އެވެ.