ރަޖިސްޓްރީ ނުކޮށް ގަވާއިދާ ހިލާފަށް ގެސްޓްހައުސްތައް ހިންގަމުންދާ މައްސަލަ ބޮޑުވަމުންދާތީ ގެސްޓްހައުސްތަކުގެ އިންސްޕެކްޝަނެއް ކުރިއަށް ގެންދަން ނިންމައިފި އެވެ.
ރާއްޖެ އަންނަ ޓޫރިސްޓުންގެ ސަލާމަތާއި ރައްކާތެރިކަން ކަށަވަރު ކުރުމަށް އެކުލަވާލަން ޖެހޭ ގަވާއިދުތަކާ ގުޅިގެން ހުށަހަޅާފައިވާ މައްސަލައާ ގުޅޭ ގޮތުން ސުވާލު ކުރުމަށް ޓޫރިޒަމް މިނިސްޓްރީގެ އިސްވެރިން ވަނީ މަޖިލީހުގެ ގަވާއިދު ކޮމެޓީއަށް ހާޒިރުކޮށް ސުވާލުކޮށްފައިވެ އެވެ.
އެގޮތުން ކޮމިޓީގައި މެންބަރަކު ކުރެއްވި ސުވާލަކަށް ޖަވާބުދެއްވަމުން ޓޫރިޒަމްގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވީ، ރަޖިސްޓްރީ ނުކޮށް ހިންގާ ގެސްޓްހައުސްތައް ހޯދައި ގަވާއިދަށް ފައްތަން މަސައްކަތް ކުރައްވާނެ ކަމަށެވެ. އެގޮތުން އެފަދަ ތަންތަން ދެނެގަތުމަށް ކުރިއަށް އޮތް ދެ ހަފުތާއެެއްހާ ދުވަހުގެ ތެރޭގައި އިންސްޕެކްޝަން ފަށާނެ ކަމަށް ވިދާޅުވި އެވެ.
މި އިންސްޕެކްޝަން އެންމެ ފުރަތަމަ ކުރިއަށް ގެންދަން ނިންމާފައި ވަނީ ކ، އއ، އދ. އަދި ވ. އަތޮޅުގަ އެވެ.
އިންސްޕެކްޝަންގެ ތެރޭގައި ގެސްޓްހައުސްތަކުގައި ރައްކާތެރިކަމާއި ސަލާމަތީ ކަންކަން ހުންނަން ޖެހޭ މިންގަނޑަށް ހުރިތޯ ބަލާނެ އެވެ. އަދި މި އިންސްޕެކްޝަންގެ އެންމެ ބޮޑު އެއް މަގުސަކީ ގަވާއިދާ ހިލާފަށް ހިންގަމުންދާ ހިންގާ ގެސްޓްހައުސްތަކުގައި ހިތާމަވެރި ހާދިސާތައް ހިނގާ މިންވަރު ވަރަށް ބޮޑަށް އިތުރުވެފައިވާތީ ކަމަށް ވެސް ނާޒިމް ވިދާޅުވި އެވެ.
ލޯކަލް ޓޫރިޒަމްގެ ތެރެއިން ރާއްޖޭގައި އެއް ދުވަހުން އަނެއް ދުވަހަށް ގެސްޓްހައުސް ވިޔަފާރި އަންނަނީ ފުޅާވަމުންނެވެ.