މާލޭ ރާޅުގަނޑު ސަރަހައްދުގައި ހަދަން ނިންމާފައުވާ ސާފިން ސްޓޭޑިއަމް އެޅުމަށް ޑިޒައިންނާއި ކޮންސެޕްޓްގެ މަސައްކަތް ނިންމައި، ދެތިން ދުވަހެއްގެ ތެރޭގައި އެތަނުގެ އަމަލީ މަސައްކަތް ވެސް ފެށުމަށް ބަޔަކާއެކު އެއްބަސްވުމުގައި ސޮއިކުރަން ނިންމަވާފައިވާ ކަމަށް ސްޕޯޓްސް މިނިސްޓަރު ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.
އެމްޑީޕީން ރޭ ބޭއްވި ޖަލްސާގައި މި ސަރުކާރުން ވައުދުވި ސާފިން ސްޓޭޑިއަމް ނަހަދަން ނިންމާފައިވާ ކަމަށް ބުނުމާ ގުޅިގެން މިނިސްޓަރު ދައުލަތުގެ މީޑިއާ، ޕީއެސްއެމަށް ވިދާޅުވީ ސާފިން އެސޯސިއޭޝަނާއި، މޯލްޑިވްސް ބޮޑީ ބޯޑިން އެސޯސިއޭޝަނާ ވެސް މަޝްވަރާކޮށްގެން ސަރުކާރުން އަންނީ ސާފިން ސްޓޭޑިއަމްގެ މަސައްކަތް ފެށުމަށް ތައްޔާރުވަމުން ކަމަށެވެ.
އެގޮތުން އަހަރު ނިމުމުގެ ކުރިން ސާފިން ސްޓޭޑިއަމްގެ އަމަލީ މަސައްކަތް ފެއްޓެވުމަށް ރައީސް ޑރ. މުހައްމަދު މުޢިއްޒު ނިންމަވާފައިވާ ކަމަށާއި، ވަރަށް އަވަހަށް އެ ސަރަހައްދުގައި ޢަމަލީ މަސައްކަތް ފެށޭނެ ކަމަށް ވިދާޅުވި އެވެ.
"ރާޅުގަނޑު ސަރަހައްދުގައި ހަމަ ސާފިން ސްޓޭޑިއަމް ހަދަން އެތަން ކުރަހާވެސް ނިންމާފައި އޮތީ. އަދި ސިޓީކައުންސިލާ ވެސް މަޝްވަރާކޮށްފައި ވާނީ އެތާނގެ ކޮންސެޕްޓް ކުރިޔަށްގެންދާނެ ގޮތް،" ރާފިއު ވިދާޅުވި އެވެ. "ދެން ސާފިން އާއި ބޮޑީ ބޯޑިން އާއި ދެ އެސޯސިއޭޝަންގެ ގެނެސްގެން އެމީހުންވެސް ބޭނުންވާ ގޮތަށް އެތަނުގެ ޑިޒައިން ކޮންސެޕްޓްވެސް ނިންމާފަ އޮތް އެއްޗެއް އެއީ. ހަމައެކަނި މަސައްކަތް ފެށުން މިހާރު އޮތީ."
ސާފިން ސްޓޭޑިއަމް އެޅުމުގެއެއްބަސްވުމުގައި މި މަހުގެ 17 ގެ ކުރިން ސޮއި ކުރާނެ ކަމަށް މިނިސްޓަރު ވިދާޅުވި އެވެ.