"ސިތާރޭ ޒަމީން ޕަރް" އަކީ ބެލުންތެރިން ހެއްވައިލާނެ ފިލްމެއް ކަމަށް ބޮލީވުޑްގެ ތަރި އާމިރް ޚާން ބުނެފި އެވެ.
ޝޫޓިން ނިންމައި، މިހާރު ޕޯސްޓް-ޕްރޮޑަކްޝަން އޮތް މަރުހަލާގައި އޮތް ފިލްމާ ބެހޭ ގޮތުން އޭނަ ބުނީ އެ ފިލްމާ މެދު ވަރަށް ބޮޑެތި އުންމީދުތަކެއް ކުރެވޭ ކަމަށެވެ. އަދި "ސިތާރޭ ޒަމީން ޕަރް" އަކީ މިހާރުގެ ހާލަތާ ވަރަށް ގުޅޭ ކަހަލަ ފިލްމެއް ކަމަށް ބުންޏެވެ.
އާމިރު ޕްރޮޑިއުސްކޮށް، ކުޅުނު އަދި އާރްއެސް ޕްރަސައްނާ ޑައިރެކްޓްކުރި މި ފިލްމަކީ ސްޕެއިންގެ 2018 ގެ ފިލްމު "ޗެމްޕިއަންސް" އަސްލަކަށް ބަލައިގެން ހަދާފައިވާ ފިލްމެކެވެ. އޭގައި ދައްކުވައި ދެނީ ހާއްސަ އެހީ އަށް ބޭނުންވާ ބާސްކެޓް ކުޅުންތެރިންތަކެއް ހިމެނޭ ޓީމެއް ގޮވައިގެން ބޮޑެތި މުބާރާތްތަކެއް ކާމިޔާބު ކުރަން ކޯޗަކު ކުރާ މަސައްކަތެވެ.
"ސިތާރޭ ޒަމީން ޕަރް" އާއި 2007 ގެ "ތާރޭ ޒަމީން ޕަރް" އާ ގުޅުވައި އާމިރު ބުނީ ދެ ފިލްމުގައި ވެސް އެއްގޮތްވާ ކަމަކީ ހާއްސަ އެހީ އަށް ބޭނުންވާ ބަޔަކަށް ފިލްމު ބިނާވުން ކަމަށެވެ.
"ތާރޭ ޒަމީން ޕަރްގައި ދައްކުވައި ދިނީ ހާއްސަ އެހީ އަށް ބޭނުންވާ ކުއްޖަކަށް އާދައިގެ ދިރިއުޅުމެއް އުޅެވޭނެ ގޮތް ދަސްކޮށް ދޭން ޓީޗަރަކު ކުރާ މަސައްކަތް. އެހެންވެ އެ ފިލްމުވީ ގިނަ ބަޔަކު ރޮއްވައިލި ވަރަށް ޖަޒުބާތީ ފިލްމަކަށް،" އާމިރު ބުންޏެވެ. "ނަމަވެސް ސިތާރޭ ޒަމީން ޕަރްގައި ފެންނާނީ ހާއްސަ އެހީ އަށް ބޭނުން ބަޔަކު އެ މީހުންގެ ނޯމަލް ކޯޗް، އަސްލު ނޯމަލް މީހަކަށް ހަދަން ކުރާ މަސައްކަތް. އެހެންވެ މިއީ ބެލުންތެރިން ހެއްވައިލާނެ ހާދިސާތަކެއް ފެންނާނެ، އަދި އުފާވެރިކަން ގެނެސްދޭނެ ކަހަލަ ފިލްމަކަށް ވާނެ."