ކޭޕާކް މައްސަލައިގައި ހިމެނޭ ވިޔަފާރިވެރިޔާ ހަސަން މަމްދޫހު (މަންޑޭ)ގެ މައްޗަށް އުފުލާފައިވާ ދައުވާއާއި ގުޅިގެން އޭނާގެ އެޕާޓްމެންޓާއި މުދާ ޝަރީއަތް ނިމެންދެން ހިފެހެއްޓުމަށް ކްރިމިނަލް ކޯޓުން އަމުރު ކޮށްފި އެވެ.
ކޭޕާކް މައްސަލައިގައި މަންޑޭގެ އިތުރުން ދައުވާ ކޮށްފައިވަނީ ޖައިޝާން ސައީދުގެ މައްޗަށެވެ. މި މައްސަލައިގައި ޖުމްލަ 201 ދައުވާ ވަނީ އުފުލާފައިވެއެވެ. މި މައްސަލައިގައި މަންޑޭގެ ޕެންޓަހައުސް އަދި މުދާ އެއް އަހަރަށް ހިފެހެއްޓުމުގެ އަމުރެއް ކުރިން ހުޅުމާލެ މެޖިސްޓްރޭޓް ކޯޓުން ވަނީ ނެރެފަ އެވެ.
މިމައްސަލައިގެ އަޑުއެހުމެއް ކްރިމިނަލް ކޯޓުގައި މިއަދު ބޭއްވިއިރު، މިއަދުގެ އަޑުއެހުމުގައި ދައުލަތުގެ ވަކީލް ވަނީ އެ އަމުރުގެ މުއްދަތު މާދަމާއަށް ހަމަވާތީ ޝަރީއަތް ނިމެންދެން އެ މުދާތައް ހިފަހައްޓައިދިނުމަށް އަމުރު ނެރެދިނުމަށް އެދިފަ އެވެ.
މިކަމުގައި މައްސަލަ ބައްލަވާ ގާޒީ ނިންމެވީ ދައުލަތުން އެދުނު ގޮތަށް، ޝަރީއަތް ނިމެންދެން މުދާތައް ހިފެހެއްޓުމަށް އަމުރު ނެރެދިނުމަށެވެ.
މީގެ ކުރިން މައްސަލައިގައި ބޭއްވި އަޑުއެހުމުގައި ދައުވާތައް އުފުލުމުން މަންޑޭ އަދި ސައީދު ވަނީ ދައުވާތަކަށް އިންކާރުކޮށްފަ އެވެ.
މަންޑޭގެ މައްޗަށް އުފުލި ދައުވާތައް:
އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ ތިން ދައުވާ
ޓެކުމުގެ ކުށުގެ 50 ދައުވާ
އޮޅުވާލުމުގެ ޢަމަލެއް ކުރުމުގެ ކުށުގެ 50 ދައުވާ
މަނީ ލޯންޑްރިންގެ ކުށުގެ އެއް ދައުވާ
ޖައިޝާން ސައީދުގެ މައްޗަށް އުފުލި ދައުވާތައް:
އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ ތިން ދައުވާ
ޓެކުމުގެ ކުށުގެ 50 ދައުވާ
ޓެކުމުގައި ބައިވެރިވުމުގެ ކުށުގެ 27 ދައުވާ
އޮޅުވާލުމުގެ އަމަލެއް ކުރުމުގެ ކުށުގެ 47 ދައުވާ
މަނީ ލޯންޑާ ކުރުމަށް އެހީތެރިވުމުގެ ކުށުގެ އެއް ދައުވާ