ކުރީގެ ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމަށް ހަމަލާ ދިން ކަމަށް ތުހުމަތު ކުރެވޭ މީހުންގެ މައްޗަށް އުފުލި ދަޢުވާތަކަށް އެ މީހުން އިންކާރުކޮށްފި އެވެ.
އެ މައްސަލައިގައި 7 މީހަކަށް ދައުވާކުރި އެވެ. އެއީ، ރ. އަލިފުށި ރިވެލި މިދުހަތު އާދަމާއި، ލ. ގަން ތުނޑި ޖަވާހިރުވިލާ މުހައްމަދު ޖަޒްލާނާއި، ދަފްތަރު ނަންބަރު 2247 އަހުމަދު މައިސާން ހާޝިމާއި، ލ. މާމެންދޫ މުރިނގު ރަޖުވާން ލަތީފާއި، ތ. ގާދިއްފުށި މުސްތަރީގެ ޝަމާލް ހުސައިންގެ އިތުރުން ތ. ދިޔަމިގިލި ރުވާ އަބާން އަބްދުލްހަންނާނާއި، އދ. މާމިގިލި ކެމީހިޔާ ޒަޔާން ނަސީރެވެ.
އެ ހަތް މީހުންގެ މައްޗަށް ވެސް ދަޢުލަތުން އުފުލީ ތޫނު ހަރިޔާރެއް ބޭނުން ކޮށްގެން ގަސްދުގައި މީހަކު މަރާލަން އުޅުމުގެ ކުށުގެ ދައުވާ އެވެ.
މައްސަލާގައި މިއަދު ބޭއްވި އަޑުއެހުމުގައި އެންމެން ވެސް ވަނީ ދަޢުވާއަށް އިންކާރުކޮށްފަ އެވެ.
އެހެންވެ މައްސަލަ ބައްލަވާ ޤާޒީ އިހުސާން ވަނީ މި މަހުގެ 24 ވަނަ ދުވަހުގެ ނިޔަލަށް ދިފާއީ ހެކި ހުށަހަޅަން ތުހުމަތު ކުރެވޭ ފަރާތްތަކަށް ފުރުސަތު ދީފަ އެވެ.
މިއަދުގެ އަޑުއެހުމުގައި ދައުލަތުން ބުނެފައި ވަނީ މިއީ މާލޭގައި ކުށްކުރާ ގުރޫޕަކުން ދުރާލާ ރާވައިގެން ކޮމަން އިންޓެންޝަނެއްގައި ދީފައިވާ ހަމަލާއެއް ކަމަށެވެ. އެކަން ސާބިތު ކުރަން ހެކި ވެސް ހުށަހެޅި އެވެ. ޝަމީމަށް ހަމަލާ ދޭން ރާވައި، މި އަހަރުގެ ޖެނުއަރީ 31 ވަނަ ދުވަހު މާލޭގެ ނޫރު މިސްކިތް ކައިރީ މަގުމަތިން އޭނަ ހުއްޓުވައި، ބޮލަށް ހަމަލާ ދޭން މަސައްކަތްކޮށް، ޝަމީމާމެދު މާރާމާރީ ހިންގައި އަތުގެ މުލައްދަނޑި ޒަހަމްކޮށްފައިވެ އެވެ.
ޝަމީމްގެ ބޮލަށް ހަމަލާދޭން މަސައްކަތްކޮށްފައި ވަނީ މިދުހަތު ކަމަށާއި، ސައިކަލުގައި އޭނަ ގޮވައިގެން އެތަނަށް ގޮސް ސީނުން ގޮވައިގެން އަނބުރާ ދިޔައީ ޖަޒްލާން ކަމަށް ބުނެފައިވެ އެވެ. އަދި އެ ސައިކަލު ހޯދައިދިނީ މައިސާން ކަމަށް ދައުލަތުން ބުންޏެވެ.
މި މައްސަލައިގައި ދައުވާކުރިއަނެއް ހަތަރު މީހުންނަކީ ހަމަލާ ދިން ވަގުތު އެ ސަރަހައްދުގައި ކާރެއްގައި މަޑުކޮށްގެން ތިބި މީހުންނެވެ. އަދި ހަމަލާ އަށް ފަހު ސައިކަލުގައި ތިބި ދެ މީހުންނާއެކު ހަތަރު މީހުން ކާރުގައި އެ ސަރަހައްދު ދޫކޮށް ގޮސްފައިވާ ކަމަށް ވެސް ދައުލަތުން ކޯޓުގައި ބުނެފައިވެ އެވެ.
މި މައްސަލައިގެ އިތުރު އަޑުއެހުމެއް މި ފަހުކޮޅު ބާއްވާނެ ކަމަށް ކޯޓުން މިއަދު ބުންޏެވެ.