އަންނަ ހޮނިހިރު ދުވަހު ބާއްވާ މި އަހަރުގެ މިސް ޔުނިވާސް މުބާރާތުގައި ވާދަކުރާ ޕެނަމާގެ ރީތީގެ ރާނީ، އިޓަލީ މޯރާ މުބާރާތުން ވަކިކޮށްފި އެވެ.
މީޑިއާތަަކުން ބުނީ މުބާރާތުގެ ބާއްވަން ކުޑަތަންވެފައި ވަނިކޮށް އޭނަ އަށް މުބާރާތުގައި އަމިއްލަ ގައުމު ތަމްސީލުކުރުމުގެ ފުރުސަތު ގެއްލުނީ އުސޫލަކާ ހިލާފުވުމުން ކަމަށެވެ. އެގޮތުން އުސޫލާ ހިލާފަށް ބޭރަށް ނުކުމެ، ލޯބިވެރިޔާއާ މޯރާ ބައްދަލުކުރި މައްސަލަ މިސް ޔުނިވާސްގެ ޑިސިޕްލިނަރީ ކޮމިޓީން ބަލައި، ނިންމީ އޭނަ އަށް މުބާރާތުގައި ވާދަކުރުމުގެ ފުރުސަތު ނުދިނުމަށެވެ.
ކޮމިޓީން ބުނެފައިވާ ގޮތުގައި މިއީ މި މުބާރާތުގެ "އިންޓަރިގްރިޓީ" ހިފަހައްޓަން އެޅި ފިޔަވަޅެކެވެ. އަދި މުބާރާތުގައި ބައިވެރިވާ ހުރިހާ އެންމެންނަކީ ވެސް އުސޫލުތަކާއި ގަވައިދުތަކަށް ފުރިހަމަ އަށް ބޯލަނބަން ޖެހޭނެ ބައެއް ކަމަށާއި އުސޫލާ ހިލާފުވުމަކީ އެއްވެސް ގޮތަކަށް ބަލައި ގަނެވޭނެ ކަމެއް ނޫން ކަމަށް މިސް ޔުނިވާސް އިން ނެރުނު ދިގު ބަޔާނުގައި ބުންޏެވެ.
މި އަހަރު ބާއްވާ 73 ވަނަ މިސް ޔުނިވާސް މުބާރާތް ކުރިއަށް ދަނީ މެކްސިކޯގެ ވެރިރަށް މެކްސިކޯ ސިޓީގަ އެވެ.
ހޮނިހިރު މިސް ޔުނިވާސް ހޮވާ އިރު، މި ފަހަރުގެ މުބާރާތުގައި 130 ގައުމަކުން ވާދަކުރެ އެވެ. މުބާރާތުގައި އަލަށް 11 ގައުމަކުން ވާދަކުރާ އިރު، އޭގެ ތެރޭގައި ރާއްޖެ ވެސް ހިމެނެ އެވެ.
ރާއްޖެ އިން މިސް ޔުނިވާސްގައި ވާދަކުރަނީ މަރިޔަމް ޝައިނާ، 21، އެވެ.