ސަރުކާރު ކުންފުނިތަކުގެ މުވައްޒަފުންގެ މުސާރަ ކުޑަކުރަންޖެހޭ ކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެ އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ދިރާސާކުރާ ކޮމިޓީގައި މިއަދު ވާހަކަދައްކަމުން މުނައްވަރު ވިދާޅުވީ ސަރުކާރު ހިއްސާވާ ކުންފުނިތަކަކީ ރިފޯމްގެ ވަރަށް ހާއްސަ ސަމާލުކަމެއް ދޭންޖެހޭ ބައެއް ކަމަށާއި އެގޮތުން ފާއިތުވި 10 އަހަރުތެރޭ ސަރުކާރު ހިއްސާވާ ކުންފުނިތަކުގެ ހިންގުން ވަރަށް ބޮޑަށް ދޯދިޔާވެގެން ގޮސްފައިވާ ކަމަށެވެ.
"ސަރުކާރުގެ ހިއްސާވާ ކުންފުނިތަކުގެ ތެރޭގައި އެބަހުރި، ހަމަ މުއައްސަސާތައް އެބަހުރި ސަރުކާރުން ފައިސާ ޕަމްޕުކުރާ، ސެލަރީ ދެއްވާ ތަންތަން. އެތަންތަނުގެ މުސާރަތައް މިއީ ވަރަށް މުހިންމު ކަމެކޭ އަޅުގަނޑު ދަންނަވާނީ ރިވިއު ކުރަން މުރާޖައާ ކުރުން،" މުނައްވަރު ވިދާޅުވި އެވެ.
މުނައްވަރު ވަނީ ސަރުކާރުން އެ ފަރާތްތަކަށް މުސާރަ ދޭނަމަ އެ މުސާރައަކީ ސިވިލްސާވަންޓުންގެ މުސާރައާ އެއްވަރު މުސާރައެއް ނުވަތަ އެއަށްވުރެ ދަށް މުސާރައަކަށް ހަދަންޖެހޭ ކަމަށް ވިދާޅުވެފަ އެވެ.
"އެހެން ނޫންނަމަ އަޅުގަނޑުމެން ގަބޫލެއް ނުކުރަން މިގެންނަ ރިފޯމުގެ ކަންތައްތައް ރަނގަޅަށް ދާނެ ކަމަކަށް،" މުނައްވަރު ވިދާޅުވި އެވެ.
އަންނަ އަހަރަށް ލަފާކޮށް ހުށަހަޅާފައި ވަނީ 56.6 ބިލިއަން ރުފިޔާގެ ބަޖެޓެކެވެ. އަންނަ އަހަރު ޚަރަދުގެ ގޮތުގައި ހިނގާނީ 49.2 ބިލިއަން ރުފިޔާ ކަމަށްވާއިރު އެއީ ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާ ކަމަށް ބަޖެޓުގައިވެ އެވެ.
އަންނަ އަހަރަށް ލަފާކޮށް ހުށަހެޅި ބަޖެޓަކީ މިއަހަރުގެ ބަޖެޓަށްވުރެ 1.6 ބިލިއަން ރުފިޔާގެ އިތުރު އަދަދެކެވެ. މިއަހަރު ބަޖެޓަށް ހުށަހެޅި ސަޕްލިމެންޓްރީ ބަޖެޓާއެކު ބަޖެޓްގެ ޖުމްލަ އަދަދު ވަނީ 55 ބިލިއަނަށް އަރާފަ އެވެ.