އއ. ތޮއްޑޫގައި ގައުމީ ޔުނިވާސިޓީ (އެމްއެންޔޫ) ގެ އެގްރިކަލްޗާ އެންޑް ސައިންސަސް ފެކަލްޓީ ގާއިމުކުރުމަށް ބިން ހަވާލުކޮށްފި އެވެ.
މިކަމަށް ދޫކުރަން ނިންމީ 8،000 އަކަފޫޓްގެ ބިމެކެވެ.
އެމްއެންޔޫ އިން ބުނީ ރާއްޖޭގެ ދަނޑުވެރިކަމުގައި އެންމެ ފާހަގަކޮށްލެވޭ ރަށްތަކުގެ ތެރޭގައި ހިމެނޭ ތޮއްޑޫގައި އެގްރިކަލްޗާ އެންޑް ސައިންސަސް ފެކަލްޓީ ގާއިމު ކުރުމުން އެ ރަށުގައި ތިބެގެން މަތީ ތައުލީމު ހާސިލުކުރުމުގެ ފުރުސަތު ލިބި ކުރިއަށް ދާން ބޮޑެޔި ފަސޭހަތަކެއް ލިބިގެން ދާނެ ކަމަށެވެ.
މީގެއިތުރުން، ފެކަލްޓީ ގާއިމުކުރެވުމާ އެއްކޮށް، ދިވެހިރާއްޖޭގެ ދަނޑުވެރިކަމުގެ ދާއިރާއަށް ޒަމާނީ ޓެކްނޮލޮޖީއާއި އުފެއްދުންތެރި ޚިޔާލުތައް ތައާރަފުވާނެ ކަމަށާއި ގައުމުގެ އިގްތިޞާދަށް އިތުރު ފުރުސަތުތަކެއް ހުޅުވިގެންދާނެ ކަމަށް އެމްއެންޔޫއިން ބުނެފައިވެއެ ވެ.
އެމްއެންޔޫ އިންބުނި ގޮތުގައި ފެކަލްޓީގައި ހަތަރު ޑިޕާޓްމަންޓެއް ގާއިމުކުރާ ނެއެވެ. އެއީ ޑިޕާޓްމަންޓް އޮފް ހޯޓިކަލްޗާ އާއި ޑިޕާޓްމަންޓް އޮފް ޕްލާންޓް ޕްރޮޖެކްޝަނާއި ޑިޕާޓްމަންޓް އޮފް ސޮއިލް އެންޑް ވޯޓާ މެނޭޖްމަންޓުގެ އިތުރުން ޑިޕާޓްމަންޓް އޮފް ފުޑް ސައިންސަސް އެންޑް ޓެކޮނޮލޮޖީ އެވެ.
އެގޮތުން، ކޮންމެ ޑީޕާޓުމަންޓެއްގައި ވެސް ޒަމާނީ ވަސީލަތްތަކާ އެއްކޮށް ހާއްސަ ލެބޯޓްރީތައް ގާއިމުކުރާނެ އެވެ. އަދި ވަސީލަތްތަކުގެ ސަބަބުން ދަރިވަރުންނަށް އަމަލީ ތަޖުރިބާ ލިބި، ދަނޑުވެރިމުގެ ދާއިރާ ތަރައްގީކުރަން ބޭނުންވާ ޒުވާނުން ތައްޔާރު ކުރުމަށް މަގުފަހިވާނެ ކަމަށް ޔުނިވަސިޓީން ބުންޏެވެ.