ވެރިކަން ކުރާ ޕީއެންސީއާ ވާދަކުރެވޭ ވަރުގެ ޕާޓީއެއް މިހާރު ނެތް ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުލްރަހީމް އަބްދުﷲ ވިދާޅުވެއްޖެ އެވެ.
ޕީއެންސީއާ ގުޅުނު އިތުރު މެމްބަރުންތަކެއްގެ ފޯމުތަކާ ހަވާލުވުމަށް ރޭ ބޭއްވި ހަފްލާ އަށް ފަހު ނޫސްވެރިންނާ ވާހަކަދައްކަމުން އަބްދުލްރަހީމް ވިދާޅުވީ މާލެ އިން އެކަނި ވެސް ޕީއެންސީ އަށް 30،000 އާއި ގާތްކުރާ އަދަދަކަށް ފޯމު ލިބިފައިވާ ކަމަށާއި މާލޭގައި މިހާރު ޕީއެންސީ އަށް ވުރެ މެމްބަރުން ގިނަ އެހެން ޕާޓީއެއް ނޯންނާނެ ކަމަށެވެ.
"ރާއްޖޭގެ އެއްވެސް ރަށެއްގައި ވެސް ހީއެއް ނުވޭ މިހާރު ޕީއެންސީއާ ވާދަކުރެވޭ ވަރުގެ ޕާޓީއެއް އޮންނާނެ ހެނެއް،" އަބްދުލްރަހީމް ވިދާޅުވި އެވެ.
އަބްދުލްރަހީމް ވިދާޅުވީ އަމާޒަކީ ކުރިއަށް އޮތް ތަނުގައި މެމްބަރުންގެ ގޮތުން ވެސް އަދި ހަރަކާތުގެ ގޮތުން ވެސް ޕީއެންސީއާ ހަމައަށް އިތުރު ޕާޓީއަކަށް ނާދެވޭ ވަރަށް ޕާޓީގެ ހަރަކާތްތައް ކުރިއަށް ގެންދިޔުން ކަމަށެވެ. އަދި އެއީ ރައީސް ޑރ. މުހައްމަދު މުއިއްޒުގެ ވެސް އަމާޒެއް ކަމަށް އަބްދުލްރަހީމް ވިދާޅުވި އެވެ.
މި ސަރުކާރަށް އެއް އަހަރު ފުރުމާ ދިމާކޮށް، މި މަހުގެ 17 ގެ ނިޔަލަށް ޕީއެންސީ އަށް 75،000 މެމްބަރުން ހަމަކޮށް، ރާއްޖޭގެ އެންމެ ބޮޑު ސިޔާސީ ޕާޓީއަށް ވުމަށް އެ ޕާޓީން އަންނަނީ މަސައްކަތް ކުރަމުންނެވެ. އެގޮތުން މެމްބަރުން އިތުކުރުމުގެ ހަރަކާތްތައް ރާއްޖޭގެ ހުރިހާ ކަންކޮޅެއްގައި ވެސް ޕީއެންސީން އަންނަނީ ކުރިއަށް ގެންދަމުންނެވެ
ޕީއެންސީން ބުނާގޮތުން އެ ޕާޓީގެ މެމްބަރުންގެ އަދަދު މިހާރު ވަނީ 80،000 އިން މައްޗަށް އަރާފަ އެވެ.