ޔުއެފާ ނޭޝަންސް ލީގު އޭގައި ރޭ ޕޮލެންޑް 5-1 އިން ބަލިކޮށް މުބާރާތުގެ ކުއާޓާފައިނަލަށް ޕޯޗުގަލް ދަތުރުކޮށްފި އެވެ.
މުބާރާތުގެ ކުއާޓާ އަށް ޕޯޗުގަލް ދަތުރުކުރީ ލީގު އޭގެ ގްރޫޕް އެކެއްގެ އެއްވަނަ މަގާމު ހޯދައިގެންނެވެ. ޕޯޗުގަލަށް ވަނީ ފަސް މެޗުން 13 ޕޮއިންޓް ހޯދާފަ އެވެ. ދެވަނައިގައި 7 ޕޮއިންޓާ އެކު އޮތީ ކްރޮއޭޝިއާ އެވެ. ތިންވަނައިގައި އޮތް ޕޮލެންޑް އަދި ހަތަރުވަނައިގައި އޮތް ސްކޮޓްލެންޑަށް ލިބިފައިވަނީ ހަތަރު ޕޮއިންޓެވެ.
އަމިއްލަ ދަނޑުގައި ކުޅުނު މި މެޗުގައި ޕޯޗުގަލުން ޖެހި ފަސް ގޯލުގެ ތެރެއިން ދެ ގޯލު ކާމިޔާބުކޮށްދިނީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ އެވެ. މި ދެ ގޯލާއެކު ރޮނާލްޑޯ ޕޯޗުގަލް ގައުމީ ޓީމަށް ކާމިޔާބުކޮށްދިން ގޯލުގެ އަދަދު ވަނީ 135 އަށް އަރާފަ އެވެ. އަދި މި މުބާރާތުގައި ރޮނާލްޑޯ މިހާތަނަށް ވަނީ ފަސް ގޯލު ކާމިޔާބުކޮށްފަ އެވެ.
ޕޯޗުގަލްގެ ގޯލުތައް ދެން ކާމިޔާބުކޮށްދިނީ ބްރޫނޯ ފެނާންޑޭސް އާއި ޕެޑްރޯ ނެޓޯގެ އިތުރުން ރަފޭލް ލިއާއޯ އެވެ. ޕޮލެންޑްގެ ހަމައެކަނި ގޯލު ކާމިޔާބުކޮށްދިނީ ޑޮމިނިކް މަޒުކް އެވެ.