މި ސަރުކާރުގެ "ހަފުތާ 52" ގެ ކާމިޔާބީތަކާ ގުޅިގެން ސޯޝަލް އެންޑް ފެމިލީ މިނިސްޓްރީން މިއަދު ހުޅުމާލޭގައި އާއިލީ ހަވީރެއް ބާއްވަން ތައްޔާރުވެއްޖެ އެވެ.
"އުފާވެރި މުޖުތަމަޢު" ޝިޢާރުގެ ދަށުން ބާއްވާ މި ހަވީރުގެ މަގުސަދަކީ ޢާއިލީ މާޙައުލެއްގައި، މި ވުޒާރާއިން ފާއިތުވި އަހަރުގެ ތެރޭގައި ކުރެވުނު މަސައްކަތްތަކުން ހާޞިލުކުރެވުނު ކާމިޔާބީތައް ރައްޔިތުންނާއި ހިއްސާކުރުމެވެ. އަދި އަންހެނުންނާއި، ކުޑަކުދިންނާއި، ނުކުޅެދުންތެރިކަން ހުންނަ ފަރާތްތަކާއި އަދި އިސްރަށްވެހިންނަށް އަމާޒުކޮށްކޮށްގެން ކުރިއަށް ގެންދެވުނު މަސައްކަތްތަކާއި، މިނިސްޓްރީން ފޯރުކޮށް ދެމުން އަންނަ ޚިދުމަތްތަކުގެ މަޢުލޫމާތު ރައްޔިތުންނަށް ފޯރުކޮށް ދިނުމަކީ ވެސް މި އާއިލީ ހަވީރު ބޭއްވުމުގެ ބޭނުމެއް ކަމަށް މިނިސްޓްރީން ބުންޏެވެ.
މި ހަވީރު ކުރިއަށް ދާނީ ހަވީރު 4:00-6:00 އަށް، ހުޅުމާލެ ސެންޓްރަލް ޕާކުގަ އެވެ.
އެގޮތުން ތަފާތު ގޭމް ސްޓޯލްތަކާއި، ކާބޯތަކެތީގެ ސްޓޯލްތަކުގެ އިތުރުން، ތަފާތު މެސްކޮޓްތަކުގެ ހަރަކާތްތައް ޢާއިލީ ހަވީރުގައި ކުރިއަށް ދާނެ އެވެ.
ޢާއިލީ ހަވީރުގައި އިސްކޮށް މިނިސްޓްރީއާ އެކީ ޓްރާންސްޕޯޓް މިނިސްޓްރީ އާއި ހައުސިން ޑިވެލޮޕްމަންޓް ކޯޕަރޭޝަން އެޗްޑީސީ) އިން ހިއްސާވެ އެވެ. މީގެ އިތުރުން، އުރީދޫ އާއި މޯލްޑިވްސް ޕެންޝަން އެޑްމިނިސްޓއްރޭޝަން އޮފީހާއި ފުލުހުންނާއި ނެޝަނަލް ސޯޝަލް ޕްރޮޓެކްޝަން އޭޖެންސީ އަދި ފެމިލީ ޕްރޮޓެކްޝަން އޮތޯރިޓީން ވެސް ހަވީރުގައި ބައިވެރިވެ އެވެ.