ބޮލީވުޑްގެ ތަރި ސައިފް އަލީ ޚާންގެ ދަރިފުޅު އިބްރާހީމް އަލީ ޚާނާއި ބަތަލާ ޕަލަކް ތިވާރީ ރާއްޖޭގައި ޗުއްޓީ ހޭދަކުރަމުން އެބަ ދެވެ.
ރައްޓެހިވެގެން އުޅޭ ކަމެއް އަޑު އަރާފައިވާ އެ ދެ މީހުންގެ އިންސްޓަގްރާމްގައި ދަތުރުގެ ފޮޓޯ/ވީޑިއޯތަކެއް ވެސް ޕޯސްޓްކޮށްފައިވެ އެވެ. އެކަމަކު އެ މީހުން ޗުއްޓީ ހޭދަކުރަނީ އެކީގައިކަން "ސިއްރުކުރުމުގެ ގޮތުން" އެކީގައި ނަގާފައިވާ އެއްޗެސް ފޮޓޯއެއް އާންމުކޮށްފައެއް ނުވެ އެވެ.
ޕަލަކްގެ ޕޯސްޓްތަކުން އޭނަ ހުރީ ފުރަވެރި ރިސޯޓްގައިކަން އެނގެ އެވެ. އެކަމަކު އިބްރާހިމްގެ ޕޯސްޓްގައި ހުރި ރިސޯޓެއް އެނގޭކަށް ނެތެވެ. ނަމަވެސް އިބްރާހީމާއި ޕަލަކްގެ ފޮޓޯތައް ބަލާލުުމުން ދެ މީހުން ވެސް ތިބީ އެއް ރިސޯޓެއްގައި ކަމަށް ބެލެވެ އެވެ.
ސަލްމާން ޚާންގެ މިދިޔަ އަހަރުގެ ފިލްމު "ކިސީ ކާ ބާއި، ކިސީ ކީ ޖާން" ގެ ރޯލަކުން ބޮލީވުޑަށް ނުކުތް ޕަލަކް، 22، އަކީ ސްޓާ ޕްލަސް އިން ގެނެސްދިން މަޝްހޫރު ސިލްސިލާ "ކަސޯޓީ ޒިންދަގީ ކީ" ގައި ޕްރޭރްނާގެ ރޯލު ކުޅުނު ޝްވޭތާ ތިވާރީގެ ދޮށި ދަރިފުޅެވެ. އޭނަ އާއި އިބްރާހީމް ރައްޓެހިވެގެން އުޅޭކަމުގެ ވާހަކަތަކެއް ދެކެވޭތާ މިހާރު ތިން އަހަރެއްހާ ދުވަސްވެފައިވާ އިރު، ވަރަށް ގިނައިން އެކިއެކި ތަންތަނުން އެ މީހުން އެކީގައި ވެސް ފެނިފައިވެ އެވެ.
އިބްރާހީމް، 23، އެކްޓަރެއްގެ ގޮތުގައި ބޮލީވުޑަށް ތައާރަފު ކުރަން ހަމަޖެހިފައި ވަނީ ކަރަން ޖޯހަރްގެ ދަރުމާ ޕްރޮޑަކްޝަނުން އަންނަ އަހަރު ގެނެސްދޭން ހަމަހެޖިފައިވާ "ސަރްޒަމީން" އިންނެވެ. ޝޫޓިން ނިންމާފައި އޮތް އެ ފިލްމުގެ ކާސްޓްގައި ކާޖޮލްގެ އިތުރުން އިބްރާހީމްގެ ދޮންމަންމަ ކަރީނާ ކަޕޫރް ސޮއިކޮށްފައި އޮތް ޑައިރެކްޓަރު މެގްނާ ގުލްޒާރުގެ ފޮލްމު "ދާއިރާ" އަށް ދާދި ފަހުން ސޮއިކުރި މަލަޔާޅަމް އެކްޓަރު ޕްރިތުވޯރާޖް ސުކްމަރަން ވެސް ހިމެނެ އެވެ.
އިބްރާހީމަކީ ބަތަލާ ސާރާ އަލީ ޚާންގެ އެއްބަނޑު އެއްބަފާ ކޮއްކޮ އެވެ. އެ މީހުންގެ ބައްޕަ ސައީފާއި ދޮންމަންމަ ކަރީނާ ވެސް މީގެ ހަފުތާއެއްހާ ދުވަސް ކުރިން ރާއްޖޭގައި ޗުއްޓީ ހޭދަކޮށްފައިވެ އެވެ. އިބްރާހިމް މީގެ ކުރިން ވެސް އާއިލާއާ އެކީ އެކި ފަހަރު މަތިން ރާއްޖެ އައިސްފައިވެ އެވެ.
ނަމަވެސް މިއީ ޕަލަކް ރާއްޖޭގައި ޗުއްޓީ ހޭދަކުރާ ފުރަތަމަ ފަހަރެވެ.