ދަރިމައިނުވާ މީހުންނަށް އިން-ވިޓްރޯ ފާޓިލައިޒޭޝަން (އައިވީއެފް) އާއި އިންޓްރަޔުޓްރައިން އިންސެމިނޭޝަން (އައިޔޫއައި) ހެދުމަށް މާލީ ގޮތުން ދަތިތައް ކުރިމަތިވެފައިވާ ފަރާތްތަކުން އެހީ ހޯދުމަށް ހުޅުވާލި ދެވަނަ ފުރުސަތުގެ ދަށުން 64 މީހަކަށް ފަރުވާ ކަަށަވަރުވެއްޖެ އެވެ.
ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ދެވަނަ ބުރަށް ފުުރުސަތު ހުޅުވާލުމުން މިދިޔަ ޖުލައި މަހުގެ ނިޔަލަށް 216 ފަރާތަކުން ފޯމު ހުށަހެޅި ކަމަށެވެ. އަދި ފޯމުތައް ރިވިއުކޮށް މިދިޔަ މަހުގެ 31 ވަނަ ދުވަހު އާންމުކުރި ވަގުތީ ލިސްޓުގައި އައިވީއެފް ހެދުމުގެ ފުުރުސަތު 63 މީހަކަށް ދޭން ނިންމި ނަމަވެސް އެ ލިސްޓަށް ޝަކުވާ ހުށަހެޅުމަށް ހުޅުވާލި ފުރުސަތާ އެކު ފޯމުތައް އަލުން ރިވިއުކޮށް، މިހާރު 64 މީހަކަށް އައިވީއެފް ހެދުމުގެ ފުރުސަތު ފަހިކޮށް ދީފައިވާ ކަމަށް އެންސްޕާ އިން ބުންޏެވެ.
އެގޮތުން އެހީ ލިބުނު މީހުންގެ ދާއިމީ ލިސްޓް ވެސް މިހާރު ވަނީ އާންމުކޮށްފަ އެވެ.
އެންސްޕާއިން ބުނީ މި ބުރުގައި އެހީ ހަމަޖެހިފައިވާ ފަރާތްތަކުން މި މަހުގެ 30 ގެ ކުރިން ފަރުވާ ކުރިއަށް ގެންދާނެ ގޮތުގެ ޕްލޭން ހިއްސާ ކުރުމާ ގުޅޭ ގޮތުން މައުލޫމާތު ފޯރުކޮށް ދޭނެ ކަމަށެވެ.
މި އަހަރު އައިވީއެފް ފަރުވާ ހަމަޖައްސައި ދޭން ނިންމީ 100 ދެމަފިރިއަކަވެ. އޭގެ ތެރެއިން ފުރަތަމަ ބުރުގެ އެހީ ދީފައި ވަނީ 37 ފަރާތަކަށެވެ.