މި އަހަރުގެ ޖުލައިގައި ރިލީޒްކުރި ބޮލީވުޑްގެ އެކްޝަން ތުރިލާ "ކިލް" ގެ ދެވަނަ ބައެއް ހަދާނެކަން އެ ފިލްމުގެ ޕްރޮޑިއުސަރު ކަރަން ޖޯހަރް ކަށަވަރުކޮށް ދީފި އެވެ.
އޭނަ ބުނީ އެ ފިލްމަކީ އިންޑިއާ އިން ބޭރުން ބޮޑި ތަރުހީބެއް ލިބުނު ފިލްމެއް ކަމަށާއި ހާއްސަކޮށް ފިލްމުގައި ހިމެނޭ އެކްޝަން މަންޒަރުތަކަށް ބޭރުގެ ކްރިޓިކުން ވަރަށް ބޮޑަށް ތައުރީފުކޮށްފައިވާ ކަމަަށެވެ. އެހެންވެ "ކިލް" އަށް ވުރެ ހުރިހާ ގޮތަކުން ވެސް ވަރުގަދަކޮށް ދެވަނަ ބައި ހަދަން ޕްލޭން ކުރަމުން އަންނަ ކަމަށް ބުންޏެވެ.
ޖުލައި މަހުގެ 5 ގައި ރިލީޒްކުރި މި ފިލްމަކީ ނިކިލް ނާގޭޝް ބަޓް ލިޔެ، ޑައިރެކްޓްކުރި ފިލްމެކެވެ. އިންޑިއާގެ "އެންމެ އަނިޔާވެރި" އެކްޝަން ފިލްމުގެ ގޮތުގައި ޕްރޮމޯޓްކުރި "ކިލް" ގެ ބަތަލުގެ ރޯލު ކުޅުނީ އަލަށް ތައާރަފުކުރި އެކްޓަރު ލަކްޝް ލަލްވާނީ އެވެ. މީގެ އިތުރު ކާސްޓުންގެ ތެރޭގައި ރާގަވް ޖުޔަލް، ތާނިއާ މަނިކްޓަލާ، އަޝިސް ވިދިއާތީ އަދި ހާޝް ޗާޔާ ހިމެނެ އެވެ.
"ކިލް" ގައި ދައްކުވައި ދީފައި ވަނީ ރޭލެއް ހައިޖެކްކުރާ ބަޔަކާ ދެކޮޅަށް ޒުވާން އާމީ ކޮމާންޑޯއަކު ކުރާ ހިތްވަރެވެ.
މި ފިލްމަށް ފަހު ލަކްޝް މިހާރު އަންނަނީ ދަރުމާ އިން ޕްރޮޑިއުސްކުރާ ލޯބީގެ ފިލްމު "ޗާންދު މޭރާ ދިލް" ގެ މަސައްކަތް ކުރަމުންނެވެ. ވިވެކް ސޯނީ ޑައިރެކްޓްކުރާ މި ފިލްމުގެ ބަތަލާ އަކީ އަނަންޔާ ޕާންޑޭ އެވެ.