ކޮރެއާގެ މަޝްހޫރު ކާރު ކުންފުނި، ހިއުންޑޭ މޮޓޯސް ގްރޫޕްގެ ސީއީއޯގެ މަގާމަށް މުޅިން އަލަށް ބިދޭސީއަކު އައްޔަންކޮށްފި އެވެ.
އެ ކުންފުނީގެ ސީއީއޯ/ޕްރެޒިޑެންޓް މަގާމަށް އައްޔަންކޮށްފައި ވަނީ ޗީފް އޮޕަރޭޓިން އޮފިސަރު ސީއޯއޯ) ގެ މަގާމުގައި ހުންނެވި ޖޯސް މުނޯޒެވެ. ދެހާސް ނަވާރައިގައި ހިއުންޑޭއާ ގުޅުނު ޖޯސް އަކީ ކުންފުނީގެ އެމެރިކާގެ ވިޔަފާރީގައި ވެސް އެންމެ އިސް ވެރިޔަކަށް ހުންނެވި ބޭފުޅާ އެވެ.
ހިއުންޑޭގެ ދިގު ތާރީހުގައި ކޮރެއާ ނޫން ބޭފުޅަކު ކުންފުނީގެ ސީއީއޯގެ މަގާމަށް އައްޔަންކޮށްފައި މި ވަނީ އެމެރިކާގެ ރައީސް ކަމަށް ޑޮނަލްޑް ޓްރަމްޕް އަލުން އިންތިހާބުވެފައި ވަނިކޮށެވެ. އެހެންވެ މީޑިއާތަކުން ބުނީ މި ބަދަލަކީ ހިއުންޑޭގެ ވިޔަފާރި އަށް ޓްރަމްޕްގެ ޒައާމަތުގައި ކުރިމަވެދާނެ "ނޭދެވޭ" ކަންކަމަކުން ރައްކާތެރިކަންް ހޯދަން އެޅި ފިޔަވަޅެއް ކަމަށް ގަބޫލު ކުރެވޭ ކަމަށެވެ.
ހިއުންޑޭގެ ސީއީއޯގެ މަގާމަށް ޖޯސް އައްޔަންކުރުމާ ގުޅިގެން، އޭނަ ރަސްމީކޮށް އެ މަގާމުގެ ޒިންމާތައް އަދާކުރަން ފައްޓަވާނީ އަންނަ އަހަރުގެ ޖެނުއަރީ 1 އިން ފެށިގެންނެވެ.
މި ބަދަލާ އެކީ މިހާރު ކުންފުނީގެ ސީއީއޯ/ޕްރެޒިޑެންޓްގެ މަގާމުގައި ހުންނެވި ޗަންގް ޖޭ-ހޫން ވަނީ ކުންފުނީގެ އޮޓޮމޭޓިވް ޑިވިޝަންގެ ވައިސް ޗެއާއަކަށް ޕްރޮމޯޓްކޮށްފަ އެވެ.
މީގެ އިތުރުން ހިއުންޑޭގެ އެޑްވައިޒަރެއްގެ މަގާމުގައި ހުންނެވި ސަންގް ކިމް ވެސް ވަނީ ކުންފުނީގެ ޕްރެޒިޑެންޓަކަށް އައްޔަންކޮށްފަ އެވެ.