އަބަދު ވެސް ތަފާތު ކަންކަން ތަޖުރިބާކޮށް، އާ ކަންކަން ވެސް އީޖާދު ކުރަން މަސައްކަތް ކުރަމުން އަންނަ އައްޑޫ ހިތަދޫ ސްކޫލުން އަނެއްކާ ވެސް ތަފާތެއް ދައްކާލައިފަ އެވެ. އެ ސްކޫލްގެ ދަރިވަރުންތަކެއް މި ފަހަރު ކުރި މަސައްކަތަކީ ސްކޫލްގެ ރުކުން އަމިއްލަ އަށް ރާ ބާލައި އެއިން ހަކުރު ހަދައި، އެ ބޭނުންކޮށްގެން ތަފާތު 73 ބާވަތެއްގެ ފޮނިކާތަކެތި ތައްޔާރުކުރުމެވެ.
އެގޮތުން ސްކޫލުން "ފަނިއާރަން" ގެ ނަމުގައި ބޭއްވި ފޮނިފަނި ސުފުރާ މަތިން ދައްކައިލީ ދިވެހިންގެ މައިގަނޑު ކެއުމުގައި މީގެ އެތަކެއް އަހަރެއް ކުރިން ބޭނުން ކުރަމުން ދިޔަ، ދިޔާ ހަކުރުން ތައްޔާރު ކުރެވިދާނެ 73 ބާވަތެއްގެ އަމިއްލަ އުފެއްދުންތަކެވެ.
"ފަނިއާރަން" އަކީ ދިވެހި ހަކުރު ތަތްކޮށްގެން އެކި ބާވަތްތަކުން ހަދާ ކާއްއެއްޗަކަށް ކިޔާ ނަމެކެވެ. މިއީ ދިވެހި ކާބަފައިންގެ މުއްސަނދި ޘަޤާފަތުގެ ތެރެއިން، އެ ސްކޫލުގެ ދަރިވަރުން ދިވެހި ހަކުރު ބޭނުންކޮށްގެން އުފެއްދި ކާބޯތަކެތީގެ އަމިއްލަ އުފެއްދުންތަކެކެވެ.
މިއީ ގިނަ ބައެއްގެ ސަމާލުކަން ވެސް ލިބުނު ކަމެކެވެ.
އެގޮތުން ދަރިވަރުން ތައްޔާރުކުރި ތަކެތީގެ ތެރެއިން 15 ބާވަތަކަށް ޖަޖުންގެ "އައުޓްސްޓޭންޑިން" މާކްސް ވެސް ލިބިފައިވެ އެވެ.
ސުފުރާގައި ބައިވެރިވާން ހިރާ ސްކޫލުގެ ހުރިހާ ދަރިވަރުންނަށް ހުޅުވާލި އެވެ. އަދި ފުރުޞަތުގެ ބޭނުން ހިފައި ބައިވެރިވީ 73 ދަރިވަރެކެވެ. އެހެންވެ 73 އުފެއްދުމަކީ ކޮންމެ ދަރިވަރެއްގެ އުފެއްދުމެކެވެ.
ދަރިވަރުންގެ އުފެއްދުންތަކުގެ ތެރޭގައި ޗޮކްލެޓާއި ސަރުބަތާއި ޕޭސްޓްރީ އާއި ކޭކާއި ކުނބުހާއި މުޑުވައްކާއްޓާއި ދިވެހި ހަކުރާ އެއްކޮށްގެން ހަދާފައިވާ ބުއިންތައް ވެސް ހިމެނެ އެވެ.
"ފަނިއާރަން" ގައި ދަރިވަރުން ބައިވެރި ކުރި ހުރިހާ ކާއެއްޗެހީގެ ރަހަފަތް ނުވަތަ ރެސިޕީ ނެރެން ހިރާ ސްކޫލުން މިހާރު އަންނަނީ ތައްޔާރުވަމުންނެވެ.