މިދިޔަ އޮކްޓޯބަރު އޮލިމްޕަހުގައި ދެއްކި ޑާކް ރެއިން އެންޓަޓައިންމަންޓްގެ ހޮރީ-ކޮމެޑީ "ބިބީ" ސްޕެއިންގައި ދައްކަން ނިންމައިފި އެވެ.
އެ ގައުމުގައި އުޅޭ ދިވެހިންނަށް ހާއްސަކޮށްގެން މި ފިލްމު އަޅުވާ އިރު، ފިލްމު ދައްކަން ހަމަޖެހިފައި ވަނީ އިނގިރޭސި ސަބް-ޓައިޓްލްއާ ވެސް އެކީގަ އެވެ. "ބިބީ" ގެ ޝޯ ދައްކާނީ ލޮގްރޯނޯގައި މިއަދެވެ. މި ޝޯގެ އިތުރުން މި މަހުގެ ފަހުކޮޅު ސްޕެއިންގެ މަޝްހޫރު ބާސެލޯނާގައި ވެސް ފިލްމު ދައްކަން ވަނީ ޕްލޭންކޮށްފަ އެވެ.
މިއީ ދިވެހި ފިލްމެއް ސްޕެއިިންގައި އަޅުވާ ފުރަތަމަ ފަހަރުކަން ފާހަގަކޮށްލެވެ އެވެ.
އޮކްޓޯބަރު މަހުގެ 7 ގައި އޮލިމްޕަހުގައި ޕްރީމިއާކުރި "ބިބީ" އަކީ އަލަށް ޑައިރެކްޝަނަށް ނުކުތް ޝަހުދާ މަހުމޫދު ލިޔެ، ޑައިރެކްޓްކުރި ފުރަތަމަ ފީޗާ ފިލްމެވެ. "ބިބީ" ގެ ލީޑް ތަރިންނަކީ އޭނަގެ ފިރިމީހާ ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ.
މީގެ އިތުރު ކާސްޓުންގެ ތެރޭގައި ޝީލާ ނަޖީބު، އަހުމަދު ސައީދު، އަބްދުﷲ ޝާފިއު (ފުބޫ)، އަހުމަދު ޝާކިރު ޝާއްކޮ (އައްމަޑޭ)، މަލީހާ ވަހީދު، ޝުހާ، އާދަމް ރިޒްވީ، ސާމީ، އަމަން ހާޒިފު އަދި މަރިޔަމް ހަލީމް ހިމެނެ އެވެ.
"ބިބީ" ގެ ޝޯތައް ޑާކް ރެއިނުން އަންނަނީ ރާއްޖޭގެ އެކި ރަށްރަށުގައި ވެސް ދައްކަމުންނެވެ.
މި ފިލްމަކީ އެ ސްޓޫޑިއޯ އިން މި އަހަރު ގެނެސްދިން ދެވަނަ ފިލްމެވެ. ފުރަތަމަ ފިލްމަކީ މާޗްގައި އެޅުވި ރިވެންޖް އެކްޝަން ތުރިލާ "ފުރޭތަ" އެވެ.