ފިލްމު ކުޅޭނީ ދެން 10 އަހަރަށް ކަމަށާއި އޭގެ ފަހުން އެކްޓިންއާ އެއްކޮށް ދުރުވާނެ ކަމަށް ބޮލީވުޑްގެ މަޝްހޫރު ތަރި އާމިރު ޚާމް ބުނެފި އެވެ.
ހޮލީވުޑް ރިޕޯޓާ އިންޑިއާ އަށް ދިން އިންޓިއުއެއްގައި އޭނަ ބުނީ މިހާރު ގުނަމުން އަންނަނީ ކެރިއަރުގެ އެންމެ ފަހު 10 އަހަރު ކަމަށެވެ. އެހެންވެ މި މުއްދަތުގެ ތެރޭގައި ގިނަ ޕްރޮޖެކްޓްތަކެއްގެ މަސައްކަތް ކުރަން ބޭނުންވާ ކަމަށް އަހަރަކު އެންމެ ފިލްމެއްގެ މަސައްކަތް ކުރުމުގެ އުސޫލުތަކެއް ގެންގުޅެމުން އައި 59 އަހަރުގެ އެކްޓަރު ބުންޏެވެ.
"މިހާރު އުމުރުން ވަރަށް ދުވަސްވެސްޖެ. ފާއިތުވި ތިރީސް ފަސް އަހަރުގެ ތެރޭގައި ވަރަށް މަސައްކަތް ވެސް ކުރެވިއްޖެ ކަމަށް އަހަރެން ގަބޫލު ކުރަނީ،" ފިލްމީ އާއިލާއަކަށް ނިސްބަތްވާ އާމިރު ބުންޏެވެ. "އެހެންވެ ކުރިއަށް އޮތް މި އަހަރު ދިހަ އަހަރަށް ފަހު އެކްޓިން އެއްކޮށް ދޫކޮށްލާނަން."
އޭނަ ބުނީ މެ މުއްދަތުގެ ތެރޭގައި ގިނަ މަސައްކަތްތަކެއް ކުރާނެ ކަމަށެވެ.
"އެއްވެސް މީހަކަށް މަރުވާނެ އިރެއް ނޭނގޭ. މާދަމާ ވެސް ހަމަ މަރުވެދާނެ." ތިން ކުދިންފެ ބައްޕަ ބުންޏެވެ.
އާމިރު ބުނީ މީގެ ތިން އަހަރު ކުރިން ވެސް އޭނަ އެކްޓިން ދޫކޮށްލަން ނިންމައި އެ ވާހަކަ އާއިލާއާ ހިއްސާކުރި ކަމަށެވެ. އެކަމަކު އެ ނިންމުން ބަދަލު ކުރަން މަޖުބޫރުވީ ދޮށީ ދެ ދަރިން ކަމަށްވާ ޖުނައިދު ޚާނާއި އިރާ ޚާންގެ އާދާހޭއި އެދުމުގެ މަތިން ކަމަށް ބުންޏެވެ.
"އަހަންނަށް ގަބޫލު ކުރެވެނީ ފިލްމީ މަސައްކަތުގައި މާ ބިޒީކޮށް އުޅެން ހަދައިގެން އާއިލާ އަށް ދޭން ވަގުތު ވެސް ނުދެވޭ ކަމަށް. އެހެންވެ ބޭނުންވީ މަސައްކަތާ ދުރުވެ، އާއިލާ އިން ދަރިންނާ އެއްކޮށް ހުރިހާ ވަގުތެއް ވެސް ހޭދަކުރަން." ދެ ކައިވެނި ރޫޅުނު ނަމަވެސް ކުރީގެ އަނބިންނާ ވަރަށް ގާތް ގުޅުމެއް ބާއްވަމުން އަންނަ އާމިރު ބުންޏެވެ.
އޭނަ ބުނި ގޮތުގައި 2022 ގެ "ލާލް ސިންގް ޗައްޑާ" އަށް ފަހު ވެސް އެކްޓިން އިން ބްރޭކެއް ނަގަން ނިންމީ އާއިލާ އަށް ވަގުތު ދިނުމުގެ ގޮތުން ކަމަށެވެ.
ހުނަރުވެރި އެކްޓަރުގެ ކުރިއަށް އޮތް ފިލްމަކީ އަންނަ އަހަރު ގެނެސްދޭން ހަމަޖެހިފައިވާ "ސިތާރޭ ޒަމީން ޕަރް" އެވެ. މިއީ އާމިރު ޕްރޮޑިއުސް ވެސް ކޮށް ކުޅުނު ފިލްމެކެވެ. މީޑިއާތަކުން ދާދި ފަހުން ރިޕޯޓްކޮށްފައިވާ ގޮތުގައި ވަރަށް ގިނަ ޑައިރެކްޓަރުން އާމިރަށް އަންނަނީ އޮފާތައް ހުށަހަޅަމުންނެވެ.
އެގޮތުން އޭނަގެ 2008 ގެ "ގަޖިނީ" ގެ ދެވަނަ ބަޔާއި ޑައިރެކްޓަރު ޒޯޔާ އަހްތަރުގެ ފިލްމަކާއި ދެކުނުގެ ޑައިރެކްޓަރު ލޮކޭޝް ކަނަގަރާޖްގެ ފިލްމެއް ވެސް އާމިރަށް ހުށަހަޅާފައިވާ ކަމަށް ރިޕޯޓްތައް ބުނެ އެވެ. ބެލެވޭ ގޮތުން ދެން އޭނަ ކުޅޭނީ ރާޖްކުމާރު ސަންތޯޝީ ޑައިރެކްޓްކޮށް، އަމިއްލަ އަށް ޕްރޮޑިއުސްކުރާ "ޗާރު ދިން ކީ ޒިންދަގީ" އެވެ.
ސަންތޯޝީގެ ކުރިއަށް އޮތް ފިލްމަކީ ވެސް އާމިރު ޕްރޮޑިއުސްކުރި ފިލްމެކެވެ. އެއީ އަދި ރިލީޒްކުރާނެ ތާރީހެއް އިއުލާން ނުކުރާ ސަނީ ޑިއޯލް އާއި ޕްރިތީ ޒިންތާ ކުޅެފައިވާ "ލާހޯރް، 1947" އެވެ.
އާމިރު އެކްޓިން އަށް ނުކުތީ 1988 ގެ "ގަޔާމަތު ސޭ ގަޔާމަތު ތަކް" އިންނެވެ.