އިޒްރޭލު ޕާސްޕޯޓު މަނާކުރުމުގެ ބިލާއެކު ސަރުކާރުގެ މުނާފިގުކަން މުޅި ދުނިޔެ އަށް ހާމަވެގެން ގޮސްފައިވާ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އިޒްރޭލު ފަތުރުވެރިންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓު މަނާކުރަން އިމިގްރޭޝަންގެ ގާނޫނަށް އިސްލާހު ގެނައުމަށް ބިލެއް ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއިލް ނަސީމް ވަނީ ހުށަހަޅާފަ އެވެ. ނަމަވެސް އެ ބިލު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ (241) ކޮމިޓީގައި އޮންނަތާ މިހާރު ވަނީ 100 އަށް ވުރެ ގިނަ ދުވަސް ވެފަ އެވެ.
އިޒްރޭލު ޕާސްޕޯޓު މަނާކުރުމުގެ މަސައްކަތް އަންނަ އަހަރުގެ ފެބްރުއަރީ މަހާ ހަމައަށް ދަންމާލަން 241 ކޮމިޓީން ދާދިފަހުން ވަނީ ފާސްކޮށްފަ އެވެ.
ފައްޔާޒު "އެކްސް"ގައި ކުރެއްވި ޕޯސްޓެއްގައި ވިދާޅުވީ ސަރުކާރުން އޮކްޓޮބަރު 16 ގައި މަޖިލީހަށް ހުށަހަޅައި 20 ދުވަސް ތެރޭ ޓެކްސް ބޮޑުކުރި ކަމަށާއި ސަރުކާރުގެ އިސްރާފުތަކަށް ހަރަދުކުރަން ދުންފަތް އަގުބޮޑުކޮށް 21 ދުވަހުގެ ތެރޭގައި ތަންފީޒު ކުރަން ފެށިއިރު، ވޭޕް މަނާކުރަން ބޭނުންވުމުން މަޖިލިސް ތެރެއިން ނިންމައި އެކަން ތަންފީޒު ކުރަން ހޭދަވީ 30 ދުވަސް ކަމަށެވެ.
ނަމަވެސް، 2 ޖޫންގައި ސަރުކާރުން އިއުލާނުކުރި ގޮތަށް އިޒްރޭލު ޕާސްޕޯޓު މަނާ ކުރެވިފައި ނުވާ ކަމަށާއި ސަރުކާރުގެ ނިންމުމަށް ފަހު 166 ދުވަސް ހޭދަވެގެން ގޮސްފައިވާއިރު ޖޫން 10 ގައި މަޖިލީހަށް ބިލު ބަލައިގަނެ 241 ކޮމިޓީގައި ތަޅު އަޅުވާފައި އޮންނަތާ 158 ދުވަސް ހޭދަވެފައިވާ ކަމަށް ފައްޔާޒު ވިދާޅުވި އެވެ. ސަރުކާރަށް އަހަރެއް ފުރުން ފާހަގަކުރާއިރު ބިލަށް ގޮތެއް ނުނިންމައި ބާއްވާފައި އޮންނަތާ ފަސް މަސް ފާއިތުވެގެން ގޮސްފައިވާ ކަމަށްވެސް ވިދާޅުވި އެވެ.
ފައްޔާޒު ވިދާޅުވީ ފެންނަމުން ދަނީ ސަރުކާރު އަދި މަޖިލީހުގެ ސުޕަ މެޖޯރިޓީ އޮވެ، އެކަމަށް ގޮތެއް ނުނިންމައި ތިބެ އަވަސް ކުރަން ގޮވާލައި ބަޔާން ނެރެ، ރައްޔިތުންނަށް ޕީއެންސީން އޮޅުވައިލާތަން ކަމަށެވެ.
"ނޫނީ ދިވެހި ދިދަޔަށް ނޫނީ ބޯނުލަނބަން ވިދާޅުވެ އެމެރިކާގެ ދިދަޔަށް ބޯލަނބަން ޖެހުނީތޯ ސުވާލު އުފެދޭ. ބިލު ފާސްކުރިޔަސް ނުކުރިޔަސް ސަރުކާރުގެ މުނާފިގުކަން މުޅި ދުނިޔެއަށް ހާމަވެއްޖެ،" ފައްޔާޒު ވިދާޅުވި އެވެ.
ފައްޔާޒު ވަނީ ސަރުކާރަށް އަހަރު ދުވަސް ވާއިރު ދޮގު ހަދައި އޮޅުވައިލުން ހުއްޓާލައި ބިލާ މެދު ގޮތެއް ނިންމުމަށް ގޮވާލާފަ އެވެ.