ބޮސްނިއާ 7-0 އިން ބަލިކޮށް ޖަރުމަނުން ޔޫއެފާ ނޭޝަންސް ލީގުގައި ރެކޯޑު މޮޅެއް ހޯދައިފި އެވެ.
ޖަރުމަނަކީ މި މުބާރާތުގެ ތާރީހުގައި އެއް މެޗެއްގައި 7 ގޯލު ކާމިޔާބުކުރި ފުރަތަމަ ޓީމެވެ.
މުބާރާތުގެ ކުއާޓާ އިން ޖާގަ ހޯދާފައިވާ ޖަރުމަނު ވަނީ ލީގު އޭގެ ގްރޫޕް ތިނެއްގެ އެއްވަނަ މަގާމު ކަށަވަރުކޮށްފަ އެވެ. ޖަރުމަނަށް ވަނީ ފަސް މެޗުން 18 ޕޮއިންޓް ހޯދާފަ އެވެ. ދެވަނައިގައި 8 ޕޮއިންޓާ އެކު އޮތީ ނެދަލޭންޑްސް އެވެ. ތިންވަނައިގައި އޮތް ހަންގޭރީއަށް ފަސް ޕޮއިންޓް އަދި ހަތަރުވަނައިގައި އޮތް ބޮސްނިއާ އަށް ލިބިފައިވަނީ އެންމެ ޕޮއިންޓެކެވެ.
އަމިއްލަ ދަނޑުގައި ކުޅުނު މެޗުގެ ފުރަތަމަ ހާފު ޖަރުމަނުން ނިންމާލީ ތިން ގޯލުގެ ލީޑަކާއެކު އެވެ. މި ތިން ގޯލު ކާމިޔާބުކޮށްދިނީ ޖަމާލް މުސިއާލާ އާއި ކައި ހަވެޓްޒް އާއި ޓިމް ކްލެއިންޑިއެންސްޓް އެވެ. ދެވަނަ ހާފުގައި ޖަރުމަނުން ކާމިޔާބު ކުރި ގޯލުތަކުގެ ތެރެއިން ފްލޮރިއަން ވްރިޓްޒް ވަނީ ދެ ގޯލު ކާމިޔާބުކޮށްފަ އެވެ.
ޖަރުމަނުގެ އަނެއް ދެ ގޯލު ކާމިޔާބުކޮށްދިނީ ކްލެއިންޑިއެންސްޓް އާއި ލީރޯ ސާނޭ އެވެ.