ރައީސް ޑރ،. މުހައްމަދު މުއިއްޒުގެ ވެރިކަމަށް މިއަދު އެއް އަހަރު ފުރިއްޖެ އެވެ.
އެ މަނިކުފާނުގެ ރައީސްކަމުގެ ހުވާކުރެއްވީ ނޮވެމްބަރު 17، 2023 ގަ އެވެ. މުއިއްޒަކީ ރާއްޖޭގެ 8 ވަނަ ރައީސެވެ. އެ މަނިކިފާނު ވެރިކަމަށް ވަޑައިގެން މިދިޔަ އަހަރު ބޭއްވި ރިޔާސީ އިންތިހާބުގެ ދެވަނަ ބުރުގައި ކުރީގެ ރައީސް އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް ބަލިކުރައްވަ އެވެ.
ފާހަގަކޮށްލެވޭ ކަމަކީ ރައީސް މުއިއްޒަކީ އިންތިހާބުގެ ދެ ބުރުގައި ވެސް ރެކޯޑް އަދަދަކަށް ވޯޓް ހޯއްދެވި ބޭފުޅެއް ކަމެވެ. އެ މަނިކުފާނު ވެރިކަމަށް ވާދަކުރެއްވީ ކުރިން ރާއްޖޭގެ އެންމެ ވަރުގަދަ އެއް ޕާޓީގެ ގޮތުގައި އޮތް ޕީޕީއެމްގެ "ހިޔަނީގައި" އޮތް ޕީއެންސީގެ ޓިކެޓްގައެވެ.
އެ ޕާޓީގެ ޓިކެޓްގައި އިންތިހާބު ކާމިޔާބު ކުރެއްވުމާ އެކީ، ޕީއެންސީ ވަރުގަދަ ކުރަން ފެއްޓެވި މަސައްކަތުގެ ތެެރެއިން މިހާރު އެ ޕީއެންސީވެފައި ވަނީ އެންމެ ވަރުގަދަ ޕާޓީއަށެވެ. ޕީއެންސީގެ މެންބަރުންގެ އަދަދު މިހާރު 80،000 އަށް ވުރެ ގިނަ ކަމަށް އެ ޕާޓީން ބުނެ އެވެ.
ރިޔާސީ އިންތިހާބުގެ ކާމިޔާބީ އަށް ފަހު މި އަހަރުގެ ކުރީކޮޅު ބޭއްވި 20 ވަނަ ރައްޔިތުންގެ މަޖިލީހުގެ ސުޕަ މެޖޯރިޓީ ވެސް ޕީއެންސީން ވަނީ ހޯދައިފަ އެވެ. އެއީ މަޖިލީހުގެ 93 ގޮނޑީގެ ތެރެއިން ސީދާ އެ ޕާޓީން ކާމިޔާބުކުރި 75 ގޮނޑިއާ އެކީގަ އެވެ.
ރައީސް މުއިއްޒު ވެރިކަމަށް ވަޑައިގެންނެވީ ވަރަށް ގިނަ ވައުދުތަކަކާ އެކީގަ އެވެ. އެ ވައުދުތައް ފޮތެއްގެ ސިފައިގައި ވެސް ނެރެ އާންމުކޮށްފައިވެ އެވެ.
ވެރިކަމަށް މިއަދު އަހަރެއްވީ އިރު، ސަރުކާރާއި ޕީއެންސީން ބުނަމުން އަންނަނީ މިއީ ވަރަށް ކާމިޔާވު އަހަރެއް ކަމަށެވެ. އެގޮތުން ވެރިކަމުގެ ފުރތަމަ އަހަރުގެ ތެރޭގައި ކުރައްވަން ރައީސް ވައުދުވެވަޑައިގެންނެވި ހުރިހާ ކަމެއް މިހާރު އޮތީ ހާސިލުވެފައި ކަމަށް ބުނެ އެވެ.
ނަމަވެސް އިދިކޮޅު ފަރާތްތަކުން އަންނަނީ މި ސަރުކާރަށް ވަރަށް ބޮޑަށް ފާޑު ކިޔައި، ނާގާބިލު ސަރުކާރެއްގެ ގޮތުގައި ސިފަކުރަމުންމެވެ. އަދި އިދިކޮޅުން އެންމެ ބާރަށް ދައްކާ އެއް ވާހަކަ އަކީ ރައީސް އިތުރުފުޅު ހައްދަވަމުން ގެންދަވާ ވާހަކަ އާއި ވައުދުތަކާ ހިލާފުވެވަޑައިގަންނަވަމުން ގެންދަވާ ވާހަކަ އެވެ.
ކޮންމެއަކަސް ރައީސް މުއިއްޒުގެ ވެރިކަމުގެ ފުރަތަމަ އަހަރު ވަރަށް ކާމިޔާބު އަހަރެއްގެ ގޮތުގައި ސަރުކާރުގެ މިނިސްޓަރުންނާއި މަޖިލިސް މެމްބަރިންނާއި ޕާޓީގެ މެންބަރުންނާއި ތާއީދުކުރާ އެހެން ފަރާތްތަކުން އަންނަނީ ފާހަގަކުރަމުންނެވެ.