އުރަމަތީގެ ކެންސަރަށް ފަރުވާ ހޯދަމުން އަންނަ އިންޑިއާގެ މަޝްހޫރު ޓީވީ ބަތަލާ، ހީނާ ޚާން ރާއްޖޭގައި ޗުއްޓީ ހޭދަކުރަމުން އެބަދެ އެވެ.
މި ފަހުން ރާއްޖެ އަށް އެންމެ ގިނައިން އަންނަ އިންޑިއާގެ ސެލެބްރިޓީންގެ ތެރޭގައި ހިމެނޭ ބަތަލާ މި ފަހަރު ޗުއްޓީ ހޭދަކުރަމުން އަންނަނީ ޖޯއި އައިލޭންޑް ރިސޯޓްގަ އެވެ. އެތަނުގައި ނަގާފައިވާ ބައެއް ފޮޓޯތަކާއި ވީޑިއޯތައް ހީނާ ސޯޝަލް މީޑިއާގައި ވެސް ޕޯސްޓްކޮށްފައިވެ އެވެ.
ސްޓާ ޕްލަސްގެ ސިލްސިލާ "ޔޭ ރިޝްތާ ކިޔާ ކެހެލާތާ ހޭ" ގައި ކުރިން އަކްޝަރާ ރޯލުގެ ކުޅެގެން މަޝްހޫރުވި ހީނާ އަށް އުރަމަތީގެ ކެންސަރު ޖެހި، ފަރުވާ ހޯދަން ފެށި ވާހަކަ އިއުލާންކުރީ މި އަހަރުގެ ޖޫން މަހުގެ ތެރޭގަ އެވެ. އޭގެ ފަހުން އޭނަ ގެންދިޔައީ ފަރުވާގެ އަޕްޑޭޓްތައް ވެސް ސޯޝަލް މީޑިއާގައި ފޭނުންނާ ހިއްސާކުރަމުންނެވެ.
ޓީވީ ސިލްސިލާތަކުގެ އިތުރުން އިންޑިއާގެ މަޝްހޫރު ރިއަލިޓީ ޝޯތައް ކަމަށްވާ "ބިގް ބޮސް" އާއި "ހަތުރޯން ކޭ ކިލާޅީ" ގައި ވެސް ވާދަކޮށްފައިވާ ހީނާ ބޮލީވުޑްގެ ފިލްމުތަކެއް ވެސް ކުޅެފައިވެ އެވެ. އޭނަގެ ފުރަތަމަ ފިލްމަކީ ޑައިރެކްޓަރު ވިކްރަމް ބަޓް 2020 ގައި ގެނެސްދިން ސައިކޮލޮޖިކަލް ތުރިލާ "ހެކްޑް" އެވެ.
ރޯހިތު ޖައިސްވާލް ކިޔާ މީހާ ރައްޓެހިވެގެން އުޅޭ ހީނާ ގިނަ އަދަދެއްގެ ވީޑިއޯ ލަވަތަކާއި ވެބް ސީރީޒްތަކެއް ވެސް ކުޅެފައިވެ އެވެ.