އިންޓަނޭޝަނަލް ކެރަމް ފެޑެރޭޝަން (އައިސީއެފް) ގެ ނައިބު ރައީސަކަށް ރާއްޖޭގެ ކެރަމް އެސޯސިއޭޝަންގެ ޖެނެރަލް ސެކްރެޓަރީ ހުސެއިން ރައުޝާން އިންތިޚާބުކޮށްފި އެވެ.
އެ މަގާމަށް އޭނަ އިންތިޚާބުކުރީ އެމެރިކާގެ ކެލިފޯނިއާގެ ސެން ފްރެންސިސްކޯގައި މިހާރު ކުރިއަށްދާ ހަވަނަ ކެރަމް ވޯލްޑް ކަޕުގެ ހަވާސާގެ ތެރެއިން އިއްޔެ ބޭއްވި އައިސީއެފްގެ ކޮންގްރެސްގަ އެވެ. އެގޮތުން އައިސީއެފްގެ މަގާމަށް ކުރިއަށް އޮތް ހަތަރު އަހަރަށް އިންތިޚާބުވުމާއެކު ރައުޝާން ވެފައި އައިސީއެފްގެ ނައިބުގެ މަގާމު ފުރުއްވާނެ އެންމެ ހަގު ބޭފުޅާއަށެވެ.
ރައުޝާނަކީ ކުރިން ޕްރޮޕެޝަނަލްކޮށް ކެރަމް ކުޅުއްވި ބޭފުޅެކެވެ. އެގޮތުން 2013 ގެ އިންޓަ-ސްކޫލް މުބާރާތުގައި ކުޅުންތެރިއެއްގެ ގޮތުގައި ކެރަމްގައި ހަރަކާތްތެރިވާން ފެއްޓެވި ރައުޝާން 2014 ވަނަ އަހަރު ރާއްޖޭގައި ބޭއްވި ކެރަމް ވޯލްޑް ކަޕުގައި އަމްޕަޔަރެއްގެ ގޮތުގައި ވެސް މަސައްކަތް ކުރެއްވި އެވެ.
ކެރަމް އެސޯސިއޭޝަންގެ ޖެނެރަލް ސެކްރެޓަރީގެ މަގާމަށް ރައުޝާން އައްޔަންކުރީ 2019 ގަ އެވެ.