މިދިޔަ އަހަރު އެމެޒޯން ޕްރައިމް ވީޑިއޯ އިން ގެނެސްދިން ޕްރިޔަންކާ ޗޯޕްޅާގެ މަގުބޫލު ވެބް ސީރީޒް "ސިޓަޑެލް" ގެ ދެވަނަ ސީޒަންގެ މަސައްކަތް ފަށައިފި އެވެ.
މީގެ ކާސްޓާއި ކްރޫ މިހާރު ތިބީ ޝޫޓިން އަށް އިނގިރޭސިވިލާތުގަ އެވެ. ސޯޝަލް މީޑިއާގައި ވެސް މި މަސައްކަތުގެ ވާހަކަ ޕްރިޔަންކާ ހިއްސާކޮށްފައިވެ އެވެ.
މިދިޔަ އަހަރުގެ އެޕްރީލް 28 ގައި ހަ އެޕިސޯޑާ އެކީ ޕްރީމިއާކުރި "ސިޓަޑެލް" އަކީ ސްޕައި އެކްޝަން ތުރިލާއެކެވެ. ޕްރިޔަންކާއާ އެކީ ރިޗަޑް މެޑެން ބަތަލުގެ ރޯލު ކުޅުނު މި ސީރީޒަކީ "އެވެންޖާޒް" ގެ ފިލްމުތަކެއް ގެނެސްދިން ދެބެއިން ކަމަށްވާ އެންތަނީ އާއި ޖޯ ރުސޯ އިސްކޮށްގެން ތިބެގެން ގެނެސްދިން އެއްޗެކެވެ.
ސީރީޒްގެ ޑައިރެކްޓަރުންނަކީ ނިއުޓަން ތޯމަސް ސިޖެލް އާއި ޖެސިޔާ ޔޫ އެވެ.
"ސިޓަޑެލް" އަކީ ޕްރިޔަންކާގެ ހޮލީވުޑް ދަތުރުގެ ފެށުން ކަމަށްވާ އޭބީސީން ދެ ސީޒަނަކަށް ގެނެސްދިން "ކްއަންޓިކޯ" އަށް ފަހު ކުޅުނު ދެވަނަ ސީރީޒެވެ. އޭގެ ފަހުން ހޮލީވުޑްގައި މަސައްކަތް ކުރަމުން އަންނަ ބަތަލާގެ އެންމެ ފަހުގެ ފިލްމަކީ މިދިޔަ އަހަރުގެ "ލަވް އެގެއިން" އެވެ.
އޭނަގެ ކުރިއަށް ހުރި ފިލްމުތަކުގެ ތެރޭގައި އެކްޝަން ކޮމެޑީ "ހެޑްސް އޮފް ސްޓޭޓް" އާއި އެކްޝަން ޑްރާމާ "ދަ ބްލަފް" ހިމެނެ އެވެ.