މިހާރުގެ ރައީސް ޑރ. މުޙައްމަދު މުޢިއްޒުގެ ސިޔާސަތުތައް ދުނިޔެ އިން ވެސް ބަލައިގަނެފައިވާ ކަމަށް ނައިބު ރައީސް ހުސައިން މުޙައްމަދު ލަޠީފް ވިދާޅުވެއްޖެ އެވެ.
ސަރުކާރަށް މިއަދު އެއް އަހަރު ފުރުމާ ގުޅިގެން ދައުލަތުގެ މީޑިއާ ޕީއެސްއެމުން ގެނެސްދެމުން އަންނަ "ހަފުތާ 52" ލައިވް ކަވަރޭޖްގައި ނައިބު ވިދާޅުވީ މި ސަރުކާރު ވެރިކަމާ ހަވާލުވި އިރު، ރާއްޖެ އޮތް ހާލަތުން އަރައިގަތުމަށް ވަރަށް ގިނަ މަސައްކަތްތަކެއްކޮށްފައިވާ ކަމަށވެެ.
އަދި ސަރުކާރުގެ ހުރިހާ މަސައްކަތްތަކެއް ވެސް ބައްޓަންވެފައި އޮތީ ރައްޔިތުންގެ ލާބަ އާއި މަންފާއަށް ކަމަށް ވިދާޅުވި އެވެ.
ނައިބު ރައީސް ވިދާޅުވީ އެންމެ ބޮޑު ގޮންޖެހުމަކަށްވީ ދައުލަތުގެ ހިންގުމަށް ދަތިވާ މިންވަރަށް ކުރީގެ ސަރުކާރުން ދަރަނި ނަގާފައި އޮތުން ކަމަށެވެ.
"ދަރަނި ދައްކަން ހުރި ގައުމުތަކާއެކު ގުޅުންތައް ބަދަހިވެއްޖެ، ޚާރިޖީ ސިޔާސަތުގެ ތެރެއިން ވަރަށް ބޮޑެތި ލުއިތަކެއް ދަނީ ލިބެމުން، މި ވެސް ކާމިޔާބީތަކެއް،" އެ މަނިކުފާނު ވިދާޅުވި އެވެ. "މި ކާމިޔާބީތައް ލިބެމުން ދަނީ އަޅުގަނޑުގެމެންގެ ޚާރިޖީ ސިޔާސަތުތަކުން، ދުނިޔެ ވެސް ބަލައިގަނެފި ރައީސްގެ ސިޔާސަތުތައް."
އެ މަނިކުފާނު ވިދާޅުވީ ރައީސް މުޢިއްޒުގެ އެންމެ ފާހަގަކޮށްލެވޭ ސިފަފުޅަކީ، ކަންކަމާ މަޝްވަރާކުރެއްވުމާއި ކަމާ ގުޅުން ހުރި ފަރާތްތަކުގެ ޚިޔާލު ހޯއްދެވުން ކަމަށެވެ.
"ކޮންމެ ކަމެއްގައިވެ ސް ވިސްނުން ހެޔޮ ބުއްދި އިސްކުރައްވާ، ކަމެއް ދިމާވިޔަސް މަޝްވަރާކުރައްވާނެ. އެހެންކަމުން އެކުގައި މަސައްކަތްކުރަން ވަރަށް ފަސޭހަ. ކެބިނެޓުގެ ލަފާފުޅުތައް ވެސް އަބަދުވެސް ހޯއްދަވާ." ނައިބު ވިދާޅުވިއެވެ.
އެ މަނިކުފާނޖު ވިދާޅުވީ ކުރިއަށް އޮތް ދުވަސްތަކުގައި ރާއްޖޭގެ އެކި ހިސާބުތަކުގައި ގިނަ މަޝްރޫޢުތަކެއް ފެށިގެން ދާނެ ކަމަށެވެ. ހާއްސަކޮށް ބޯހިޔާވަހިކަމުގެ މަޝްރޫއުތައް ހިމެނޭ ކަމަށް ވިދާޅުވި އެވެ.
"ބޯހިޔާވަހިކަމުގެ މަޝްރޫޢުތައް ފެށި، ރައްޔިތުންނަށް ބޮޑު ހައްލެއް ލިބިގެންދާނެ،" ނައިބު ވިދާޅުވި އެވެ. "ބަޖެޓުގެ ބޮޑު ބައި އޮތީ އެކަމަށް ހައްލު ހޯދުމަށް."