ކުރިއަށް އޮތީ ރައްޔިތުންނަށް ލޮލަށް ފެންނަ ތަރައްގީގެ އަހަރު ކަމަށް ރައްޔިތުންގެ މަޖިލީހުގެ ރައީސް އަބްދުލްރަހީމް އަބްދުﷲ ވިދާޅުވެއްޖެ އެވެ.
މި ސަރުކާރަށް އެއް އަހަރު ފުރުމާ ގުޅިގެން ޕީއެސްއެމް ނިއުސްއަށް ދެއްވި ބަސްދީގަތުމެއްގައި އަބްދުލްރަހީމް ވިދާޅުވީ މި ސަރުކާރުގެ ފުރަތަމަ އަހަރު ވެސް ގިނަ ކާމިޔާބީތަކެއް ހޯދާފައިވާ ކަމަށާއި ކޮންމެ ކާމިޔާބަކީ އަތްލެވޭ އަދި ބައެއް ކާމިޔާބީތަކަކީ ލޮލަށް ފެންނަ އެއްޗެއް ނޫން ކަމަށެވެ. އޭގެތެރޭގައި ފައިސާ ޗާޕުކުރުން ހުއްޓާލުމާއި ރާއްޖޭގައި ތިބި އިންޑިއާ ސިފައިން ބޭލުން ފާހަގަކުރެއްވި އެވެ.
އަދި އެއްވެސް ސަރުކާރަކަށް ހުރިހާ ވައުދެއް އެއް އަހަރުތެރޭ ނުފުއްދޭނެ ކަމަށާއި އެކަމަށް ވަގުތު ނަގާނެއިރު، ރައީސް ޑރ. މުހައްމަދު މުއިއްޒު މިހާރުވެސް ގެންދަވަނީ ފަހަރަކު ކަމެއް ކުރައްވަމުން ކަމަށް އަބްދުލްރަހީމް ވިދާޅުވި އެވެ.
"އަންނަ އަހަރަކީ ރައްޔިތުންނަށް ލޮލަށް ފެންނަ، އަތްލެވޭ ތަރައްގީގެ އަހަރު އިރާދަކުރެވިއްޔާ،" އަބްދުލްރަހީމް ވިދާޅުވި އެވެ.
ރައީސް މުއިއްޒުގެ އެންމެ ބޮޑު އެއް ވައުދަކީ ގެދޮރުވެރިކަމުގެ ވައުދުކަން ފާހަގަކުރައްވަމުން އަބްދުލްރަހީމް ވިދާޅުވީ އެ ވައުދު ފުއްދުމަށްޓަކާ ރާއްޖޭގައި މިހާތަނަށް ހިންގޭ އެންމެ ބިޔަ ބޮޑު މަޝްރޫއު ކަމަށްވާ، ރަސްމާލެ މަޝްރޫއު ވެރިކަމަށް ވަޑައިގެން ކުޑަ ދުވަސްކޮޅެއްގެ ތެރޭގައި ފެއްޓެވި ކަމަށެވެ. އަދި އަންނަ އަހަރު ވެގެންދާނީ ރާއްޖޭގެ ތާރީހުގައި މިހާތަނަށް ތަރައްގީގެ މަޝްރޫއުތައް ނުހިނގާހާ ގިނަ އަދަދަކަށް މަޝްރޫއުތައް ހިންގާނެ އަހަރަކަށް ކަމަށްވެސް ވިދާޅުވި އެވެ.
މީގެއިތުރުން އަބްދުލްރަހީމް ވަނީ ވާދަވެރިން ސަރުކާރަށް އަމާޒުކުރަމުން އަންނަނީ ބިނާކުރަނިވި ފާޑުކިޔުންތަކެއް ނޫން ކަމަށާއި އެފަދަ ކަންކަމަކީ މާބޮޑަށް ކަންބޮޑުވާ އަދި ރައްދު ދޭން ވެސް ބޭނުންވާ ފަދަ ކަންތައްތަކެއް ނޫން ކަމަށް ވިދާޅުވެފަ އެވެ.