ޝަރުއީ ދާއިރާ އަށް ނުފޫޒު ފޯރުވާ ފަރާތްތައް މަގާމުން ވަގުތުން ވަކިކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ސަރުކާރަށް އެއް އަހަރު ފުރުން ފާހަގަކުރަން ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ އެމަނިކުފާނު މަގާމުތަކަށް އައްޔަންކުރައްވާފައިވާ އެއްވެސް ފަރާތެއް ޝަރުއީ ދާއިރާ އަށް ނުފޫޒެއް ފޯރުވާކަން އެނގޭނަމަ އެކަން އަންގަވައިދެއްވުމަށް ރައްޔިތުންގެ ކިބައިން އެދިވަޑައިގަންނަވާ ކަމަށާއި އެ ފަރާތެއް ވަގުތުން މަގާމުން ވަކިކުރައްވާނެ ކަމަށެވެ.
"ކޮންމެ މީހެއް ވިޔަސް ވަކިކުރާނަން. އެއީ އަޅުގަނޑު ބޭނުމެއް ނޫން ޝަރުއީ ދާއިރާ އަށް މި ގައުމުގައި ނުފޫޒު ފޯރުވާކަށް. އެކަން ނިމިއްޖެއޭ މި ގައުމުގައި،" ރައީސް ވިދާޅުވި އެވެ.
ރައީސް ވިދާޅުވީ މި ސަރުކާރަށް މިވީ އެއް އަހަރުތެރޭ ސިޔާސީ އެއްވެސް ފަރާތަކަށް އަދަބެއް ދީފައި ނުވާނެ ކަމަށާއި ބޭނުން ވަނީ ގައުމަށް ހަމަޖެހުން ގެނެސް ބަދަލު ހިފުމުގެ ރޫހު ނިމުމަކަށް ގެންނަން ކަމަށެވެ. ނަމަވެސް ބައެއް ފަރާތްތަކުން ބަދަލުހިފާ ހިތުން ސޯޝަލް މީޑިއާ ފަދަ ތަންތަނުގައި ތަފާތު އެކި ވާހަކަތައް ދައްކަމުންދާ ކަމަށާއި އެމަނިކުފާނު ވެރިކަމަށް ގެންނަން ރައްޔިތުން ނިންމީ އެ ބޭފުޅުންނަށް ބަދަލުހިފަން ފުރުސަތު ނުދޭން ވެގެން ކަމަށްވެސް ރައީސް ވިދާޅުވި އެވެ.
"އެހެންވީމާ ބަދަލުހިފުމެއް ދެން ނެތް މި ގައުމުގައި. ބަދަލުހިފަން ބޭނުންވާ ބޭފުޅުން އެ ވިސްނުން ދޫކޮށްލައްވާ،" ރައީސް ވިދާޅުވި އެވެ.
ރާއްޖޭގައި ސިޔާސީ ކުށްވެރިންނެއް ދެން ނުތިބޭނެ ކަމަށާއި އޭގެ ބަދަލުގައި އަދުލު އިންސާފު ގާއިމުވެގެންދާނެ ކަމަށްވެސް ރައީސް ވިދާޅުވި އެވެ.