"ދިވެހި ގައުމިއްޔަތުގެ އިސްވަރު" ގެ އޮފީސް، ރަސްމީކޮށް ހުޅުވައިފި އެވެ.
ގައުމީ ދާރުލްއާސާރުގައި އިއްޔެ ހަވީރު ބޭއްވި ރަސްމިއްޔާތުގައި އެތަން ހުޅުވައިދެއްވީ ފަސްޓްލޭޑީ ސާޖިދާ މުހައްމަދެވެ.
އެ ރަސްމިއްޔާތުގައި ބަހާ ބެހޭ މިނިސްޓްރީން ފާއިތުވި އަހަރު ދުވަހުގެ ތެރޭގައި ކުރި މުހިންމު މަސައްކަތްތައް ހިމެނޭ ފޮތް، "ހިދުމަތުގެ 52 ހަފުތާގެ ފޮތް" ވެސް ނެރެފައިވެ އެެވެ.
އިސްވަރުގެ އޮފީސް ހުޅުވުމުގެ ރަސްމިއްޔާތުގައި ބަހާ ބެހޭ މިނިސްޓަރު އާދަމް ނަސީރު ވިދާޅުވީ ދިވެހި ގައުމިއްޔަތާ ގުޅުންހުރި ހުރިހާ އިދާރާތަކެއް ގުޅިގެން މަސައްކަތް ކުރާ ދާއިރާއަކަށް މި ދާއިރާ ބަދަލުވެގެން ދާނެ ކަމަށެވެ. އަދި އެ އޮފީހަކީ އެކަމަށް ފަހި މާހައުލަކަށް ވާނެ ކަމަށާއި އޮފީސް ފަރުމާކޮށްފައި ވަނީ އެ އޮފީހުގައި އިސްވާރުންގެ ކޮޓަރިކޮޅުތައް ހުންނާނެ ގޮތަށް ކަމަށް ވިދާޅުވި އެވެ.
މިދިޔަ ސެޕްޓެމްބަރު މަހު ސަރުކާރުން ވަނީ އިލްމީ ދިރާސާތަކަށް ހާއްސަކޮށްގެން "ދިވެހި ގައުމިއްޔަތުގެ އިސްވަރު" ގެ ނަމުގައި ކޮލެޖެއް ވެސް އިފުތިތާހުކޮށްފަ އެވެ. އިސްވަރު އެކުލެވިގެންވަނީ މައިގަނޑު ފަސް ދާއިރާއެއްގެ މައްޗަށެވެ. އެއީ ދިވެހި ބަހާއި ދިވެހި ތާރީހާއި ދިވެހި ތަރިކަ އާއި ދިވެހި ސުމޭކު އަދި ދިވެހި ފަންނުގެ ދާއިރާ އެވެ.
އެއިން ކޮންމެ ދާއިރާއަކަށް އިސް ބޭފުޅުން އައްޔަންކޮށްފައިވެ އެވެ.
ދިވެހި ގައުމިއްޔަތު އިސްވަރު ކައުންސިލުގެ އިސްވާރުން:
* ދިވެހި ބަހުގެ އިސްވާރު: މަރްޔަމް ތައުފީގާ
* ދިވެހި ތާރީހުގެ އިސްވާރު: އަލްއުސްތާޒު ކަށިމާ އަހުމަދު ޝާކިރު
* ދިވެހި ތަރިކައިގެ އިސްވާރު: ހަސަން ޒަރީރު
* ދިވެހި ސުމޭކުގެ އިސްވާރު: މުހައްމަދު އަބްދުލްގާދިރު
* ދިވެހި ފަންނުގެ އިސްވާރު: މަރްޔަމް އިޝާ އަޒީޒް
ދިވެހި ގައުމިއްޔަތު އިސްވަރު ކައުންސިލުގެ ބޭފުޅުންނަށް އިސްވާރުކަން ހަވާލުކޮށް ދެއްވީ ރައީސް ޑރ. މުހައްމަދު މުއިއްޒެވެ.