ތެލަސީމިއާ ބަލީގެ މީހުންނަށް ހާއްސަކޮށްގެގެން މިއަދުން ފެށިގެން އާ ކްލިނިކެއްގެ ހިދުމަތް ދޭން ފަށައިފި އެވެ.
މޯލްޑިވްސް ބްލަޑް ސާވިސް އިން އެ ކްލިނިކްގެ ހިދުމަތް ދެނީ "އޮޕަރޭޝަނަލް ޕްރޮސީޖަ ފޯ އިންޑިވިޑުއަލައިޒްޑް" ގެ ނަމުގަ އެވެ. މިތަނުގެ ހިދުމަތް މިއަދުން ފެށިގެން ބަންދު ނޫން ކޮންމެ ދުވަހެއްގެ ހެދުނު 8:00 އިން ރޭގަނޑު 7:30 އަށް ލިބޭނެ ކަމަށް ބްލަޑް ސާވިސް އިން ބުންޏެވެ.
ރާއްޖޭގައި ތެލަސީމިއާ ބައްޔަށް ހޮސްޕިޓަލެއް ވެސް އަޅަން މިހާރު އޮތީ ނިންމައިފަ އެވެ. އެ މަޝްރޫއު މިދިޔަ މަހުގެ ތެރޭގައި ވަނީ ރަސްމީކޮށް އިފުތިތާހު ވެސް ކޮށްފަ އެވެ.
ރާއްޖޭގެ ތެލެސީމިއާ ތަފުތަރުގައި 959 މީހަކު ހިމެނެ އެވެ. އޭގެ ތެރެއިން މި ވަގުތު ދުނިޔޭގައި ތިބީ 666 މީހުންނެވެ. ތެލަސީމިއާ ދަފުތަރަށް މި އަހަރު އަލަށް 13 ކުއްޖަކު އިތުރުވެފައިވެ އެވެ.
ސަރުކާރުން މިހާރު އަންނަނީ ރާއްޖެ އިން ބޭރަށް ފޮނުވައިގެން ތެލަސީމިއާ ބަލީގެ މީހުންނަށް ބޯންމެރޯ ޓްރާންސްޕްލާންޓް ފަރުވާ ވެސް ފޯރުކޮށް ދެމުންނެވެ. އެގޮތުން މި ސަރުކާރުން އޮތީ އަހަރަކު 10 ކުއްޖަކު އެ ފަރުވާ އަށް ފޮނުވަން ނިންމައިފަ އެވެ. އެގޮތުން މި އަހަރުގެ ތެރޭގައި ބައެއް ކުދިން ފަރުވާ ފުރިހަމަކޮށްފައިވާ އިރު، މިހާރު ވެސް ބައެއް ކުދިން އަންނަނީ ފަރުވާ ހޯދަމުންނެވެ.