ބޮލީވުޑްގެ ޒުވާން އެކްޓަރު ޓައިގާ ޝްރޮފް ވަރުގަދަ އެކްޝަން ރޯލެއް ކުޅެމުން އަންނަ ކާމިޔާބު ފްރެންޗައިޒް "ބާގީ 4" ގެ ޝޫޓިން މިއަދު ފަށައި ފިލްމުގެ ފަސްޓްލުކް ޕޯސްޓަރާ އެކީ ފިލްމު ރިލީޒްކުރާ ތާރީހު ވެސް އިއުލާންކޮށްފި އެވެ.
މި ފްރެންޗައިޒްގެ ކުރީގެ ތިން ބައި ވެސް ޕްރޮޑިއުސްކުރި ސާޖިދު ނަދިއަދުވާލާގެ ނަދިއަދުވާލާ ގްރޭންް ސަން އިން ހަދާ ފިލްމު ބެލުންތެރިންނަށް ގެނެސްދޭން ނިންމީ އަންނަ އަހަރުގެ ސެޕްޓެމްބަރު މަހުގެ 5 ގަ އެވެ. "ބާގީ 4" ގެ ޑައިރެކްޓަރަކީ ދާދި ފަހުން ބައެއް މީޑިއާތަކުން ވެސް ރިޕޯޓްކޮށްފައިވާ ގޮތަށް ކުޅަދާނަ ކަންނާޑާ ޑައިރެކްޓަރު އޭ ހަރްޝާ އެވެ.
އޭނަ އަކީ މިދިޔަ އޮގަސްޓް މަހު ރިލީޒްކުރި ޖޯން އަބްރަހަމްގެ "ވޭދާ" ގެ ވެސް ޑައިރެކްޓަރެވެ.
"ބާގީ 4" ގެ ޝޫޓިން މިއަދު ފެށި ނަމަވެސް ފިލްމުގެ ބަތަލާ އަކީ ކާކު ކަމެއް ހާމަކޮށްފައެއް ނުވެ އެވެ. ދެހާސް ވިހީގައި ރިލީޒްކުރި "ބާގީ 3" އާއި 2016 ގެ "ބާގީ" ގެ ބަތަލާ އަކީ ޝްރަދާ ކަޕޫރެވެ. އަދި 2018 ގެ "ބާގީ 2" ގެ ބަތަލާ އަކީ ޓައިގާގެ ކުރީގެ ލޯބިވެރިޔާ ޑިޝާ ޕަޓާނީ އެވެ.
"ބާގީ" ގެ ފުރަތަމަ ބައި ސަބީރް ޚާން ޑައިރެކްޓްކުރި އިރު، އަނެއް ދެ ފިލްމުގެ ޑައިރެކްޓަރަކީ މަޝްހޫރު ކޮރިއޮގްރާފަރު އަހުމަދު ޚާނެވެ.
ބޮލީވުޑްގެ މިހާރުގެ އެންމެ ވަރުގަދަ އެކްޝަން ތަރިންގެ ތެރޭގައި ހިމެނޭ ޓައިގާގެ އެންމެ ފަހުގެ ފިލްމަކީ މި މަހުގެ 1 ގައި ރިލީޒްކުރި ރޯހިތު ޝެޓީގެ "ސިންގަމް އެގެއިން" އެވެ.