ދެ މިލިއަން ޓޫރިސްޓުން ގެންނަން މި އަހަރު ހިފާފައި އޮތް އަމާޒަށް އަންނަ މަހުގެ ފަހުކޮޅު ވާސިލުވެވޭނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވި އެވެ.
އޭނަ ވިދާޅުވީ އަހަރު ނިމުމުގެ ކުރިން އެ އަދަދު ހަމަވާނެކަމުގެ ޔަގީންކަން ވެސް ވަރަށް ބޮޑު ކަމަށެވެ. މިނިސްޓަރު ވިދާޅުވި ގޮތުގައި މި އަހަރަކީ ރާއްޖޭގެ ޓޫރިޒަމްގެ ތާރީހުގައި ރެކޯޑްތަކެއް ވެސް ހެދި އަހަރެކެވެ. އެގޮތުން އެންމެ ގިނަ ޓޫރިސްޓުން އެއް ދުވަހެއްގައި ފެބްރުއަރީގެ ތެރޭގައި އައުމާއި އެއް މަހެއްގައި އެންމެ ގިނަ ޓޫރިސްޓުން މި އަހަރުގެ ފެބްރުއަރީގައި އައުން ހިމެނޭ ކަމަށް ވިދާޅުވި އެވެ.
މި އަހަރުގެ މިހާތަނަށް ރާއްޖެ އަށް 1.7 މިލިއަން ޓޫރިސްޓުން ވަނީ އައިސްފަ އެެވެ. އެއް މިލިއަން ވަނަ ޓޫރިސްޓް ރާއްޖެ އައިސްފައި ވަނީ ޖޫން މަހުގެ 27 ގަ އެވެ.
ދެ މިލިއަން ޓޫރިސްޓުންނަށް އަމާޒު ހިފާފައިވާ އިރު، އެ އަދަދު ހަމަވާ އެ ދުވަހު އެކަން ފާހަގަ ވެސް ކުރާނެ އެވެ.
ރާއްޖެ އަށް މިހާރު އެންމެ ގިނަ ޓޫރިސްޓުން އަންނަ ތިން ގައުމަކީ ޗައިނާ އާއި ރަޝިއާގެ އިތުރުން އިނގިރޭސިވިލާތެވެ. އެންމެ ގިނަ ޓޫރިސްޓުން އަންނަ 10 ގައުމުގެ ލިސްޓްގައި ދެން ހިމެނެނީ ޖަރުމަން، އިޓަލީ، އިންޑިއާ، އެމެރިކާ، ފްރާންސް، ސްޕެއިން އަދި ސްވިޓްޒަލޭންޑެވެ.
ޗައިނާ އިން އެކަނި ރާއްޖެ އައި ޓޫރިސްޓުންގެ އަދަދު 200،000 އިން މަތީގައި އުޅޭ އިރު، ލައްކައަކަށް ވުރެ ގިނަ ޓޫރިސްޓުން ދެން އައިސްފައި ވަނީ ފަސް ގައުމަކުންނެވެ.
ރާއްޖޭގެ ޓޫރިޒަމް ޕްރޮމޯޓް ކުރަން މި އަހަރުގެ މިހާތަނަށް ދުނިޔޭގެ އެކި ހިސާބުތަކުގައި ހަރަކާތްތަކެއް ހިންގާފައިވެ އެވެ. އޭގެ ތެރޭގައި ބޮޑެތި ފެއާތަކުގައި ބައިވެރިވުމާއި ބައެއް ގައުމުތަކުގައު ރޯޑްޝޯތައް ބޭއްވުން ހިމެނެ އެވެ.