މޯލްޑިވްސް ބްރޯޑްކާސްޓިން ކޮމިޝަނުގެ މެންބަރު ކަމަށް ކުރިމަތިލާން ރައީސް އޮފީހުން މިއަދު ހުޅުވާލައިފި އެވެ.
މިކަމަށް ޝައުގުވެރިވާ ފަރާތްތަކަށް ކުރިމަތިލާން ހުޅުވައިލީ މި މަހުގެ 26 އާ ހަމައަށެވެ. ބްރޯޑްކޮމްގެ މެންބަރު ކަމަށް ހުޅުވައިލީ މިހާރު ތިބި މެންބަރުންގެ ތެރެއިން ދެ މެންބަރެއްގެ މުއްދަތު ހަމަވާތީ އެވެ. އެއީ ބްރޯޑްކޮމްގެ ރައީސް މެމްބަރު މަރިޔަމް ވަހީދާ އަދި މެމްބަރު އަލީ ޔޫސުފް އެވެ.
ބްރޯޑްކޮމްގެ މެމްބަރު ކަމަށް ކުރިމަތިލާން ހުޅުވައިލި އިރު، އެ ކޮމިޝަނާއި މޯލްޑިވްސް މީޑިއާ ކައުންސިލް (އެމްއެމްސީ) އެއްކޮށްލައި، މީޑިއާ ކޮމިޝަނަށް އުފައްދަން މަޖިލީހަށް އޮތީ ބިލެއް ހުށަހަޅައިފަ އެވެ. އެ ބިލާ ގުޅިގެން މީޑިއާގެ ދާއިރާގެ ވަރަށް ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.
ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު ހުށަހެޅުއްވި ބިލުގައި ބުނެފައި ވަނީ އެ ގާނޫނަކަށްވެގެން އަމަލުކުރަން ފެށުމާއެކު އެމްއެމްސީ އާއި އަދި ބްރޯޑް ކޮމް އުވާލެވޭނެ ކަމަށާއި މޯލްޑިވްސް މީޑިއާ އެންޑް ބްރޯޑްކާސްޓިންގެ ނަމުގައި އުފައްދާ ކޮމިޝަނުގައި ތިބޭނީ 7 މެންބަރުން ކަމަށް ބުނެފައިވެ ވެ. އަދި އޭގެ ތެރެއިން 4 މެންބަރުން ކަނޑައަޅާނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ ކަމަށް ބުނެފައިވެ އެވެ.
ބިލްގައިވާ ގޮތުގައި އަނެއް ތިން މެންބަރުންނަކީ މީޑިއާއިން އިންތިހާބުކުރާ މެންބަރުން ނަމަވެސް ކޮމިޝަންގެ ރައީސާއި ނައިބު ރައީސް ކަނޑައެޅުމުގެ ބާރު އޮންނާނީ ރައީސުލްޖުމްހުރިއްޔާއަށެވެ.
ބިލުގައި ބުނީ ކޮމިޝަން އެކުލަވާލައި މެންބަރުން ކޮމިޝަން ހިންގުމާ ހަވާލުވަންދެން ކޮމިޝަނުގެ ކަންކަން ވަގުތީ ގޮތުން ހިންގާނީ ސިވިލް ސާވިސް ކޮމިޝަން (ސީއެސްސީ) އިން އެކުލަވާލާ ފަސް މެންބަރުންގެ ވަގުތީ ކޮމިޓީއަކުން ކަމަށެވެ.
އެ ބިލާ މެދު ނޫސްވެރިން ކަންބޮޑުވުން ފާޅު ކުރަން ފެށުމުން ރައީސް ޑރ. މުހައްމަދު މުއިއްޒު ރޭ ވިދާޅުވެފައި ވަނީ އެ ބިލު ބޭރުކޮށްލާނެ ކަމަށެވެ.