ވޭޕް ކުރުން ފަދަ ކަންކަމުގައި ހުރި ގެއްލުންތައް ޞިއްޙީ ދާއިރާގައި މަސައްކަތްކުރައްވާ ފަރާތްތަކުން ރައްޔިތުންނަށް ކިޔައިދޭން ފަސްޓް ލޭޑީ، މެޑަމް ސާޖިދާ މުޙައްމަދު ބާރުއަޅުއްވައިފި އެވެ.
މެޑަމް ސާޖިދާ މިކަމަށް ބާރުއަޅުއްވާފައި ވަނީ މިއަދު މިނިސްޓްރީ އޮފް ހެލްތުގެ ސިވިލް ސާވިސް މުވައްޒަފުންގެ 52 ހަފުތާގެ މަސައްކަތުގެ އަގުވަޒަންކުރުމުގެ ގޮތުން ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.
އޮރެންޖް ހިޔާގައި ކުރިއަށްދިޔަ މި ރަސްމިއްޔާތުގައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ ޞިއްޙީ ދާއިރާގެ ފަރާތްތަކަކީ ނުހަނު އިހުލާސްތެރިކަމާއެކު މަސައްކަތްކުރައްވާ ބައެއް ކަމަށާއި އަދި ސިވިލް ސާވިސްގެ މުވައްޒަފުންނާއި ޕޮލިސީ ލެވެލްގައި މަސައްކަތްކުރައްވާ ފަރާތްތައް ގުޅިގެން މަސައްކަތްކުރެއްވުމަށް އެދިވަޑައިގެންނެވި އެވެ.
އަދި ސަރުކާރުން ރައްޔިތުންނަށްޓަކައި ކަނޑައަޅުއްވާ ސިޔާސަތުތައް ތަންފީޒުކުރުމަށް ސިވިލް ސާވިސް މުވައްޒަފުން އެއްބައިވަންތަކަމާއެކު މަސައްކަތްކުރެއްވުމަށާއި، އާންމު ޞިއްޙަތުގެ ދުޅަހެޔޮ ކަމަށްޓަކައި، "ވޭޕް" ކުރުން ފަދަ ކަންކަމުގައި ހުރި ގެއްލުންތައް ސިއްހީ ދާއިރާގައި މަސައްކަތް ކުރައްވާ ފަރާތްތަކުން ރައްޔިތުންނަށް ކިޔައިދޭންޖެހޭ ކަމަށްވެސް ވިދާޅުވި އެވެ.
"އަޅުގަނޑުމެން ބޭނުންވެގެން އުޅުނު ބައެއް ކަންތައްތައް އަޅުގަނޑުމެންނަށް އެބަ ފެނޭ މިއަދު. ވަކިން ހާއްސަކޮށް ވޭޕްގެ ކަންތައްތައް. މިކަމުގައި އަޅުގަނޑުމެން އެބަ ޖެހޭ ޓެކްނިކަލް މީހުންގެ ހައިސިއްޔަތުން ނިކުންނަން،" މެޑަމް ސާޖިދާ ވިދާޅުވި އެވެ.
ރާއްޖެ އަށް ވޭޕް އެތެރެކުރުމަކީ މިހާރު މަނާ ކަމެއް ކަމަށްވާއިރު، އަންނަ މަހުގެ 15 އިން ފެށިގެން ރާއްޖޭގައި ވޭޕް ބޭނުން ކުރުމަކީ ވެސް މަނާ ކަމެކެވެ.