އަދިވެސް ގިނަ ބަޔަކު އޭނަ ސިފަކުރަނީ އެކްޓަރު ޝާހިދު ކަޕޫރްގެ ކޮއްކޮގެ ގޮތުގައި ކަމަށާއި އެކަމާ މާ ބޮޑު ފަރުވާލެއް ވެސް ނެތް ކަމަށް އެކްޓަރު އިޝާން ހައްތަރު ބުނެފި އެެވެ.
މިހާރު އުމުރުން 29 އަހަރުގެ އިޝާނަކީ ޝާހިދާ އެއްބަނޑު ކޮއްކޮއެކެވެ. އޭނަގެ އެކްޓިން ދަތުރުގެ ފެށުމަކީ އިރާންގެ ޑައިރެކްޓަރުގެ މާޖިދު މަޖިދީގެ 2017 ގެ "ބިޔޯންޑް ދަ ކްލައުޑްސް" އެވެ. އިޝާންގެ ފުރަތަމަ ބޮލީވުޑް ފިލްމަކީ 2018 ގެ "ދަޅަކް" އެވެ.
އޭގެ ފަހުން އޭނަ ކުޅުނު ފިލްމުތަކުގެ ތެރޭގައި "ކާލީ ޕީލީ"، "ފޯން ބޫތު" އަދި "ޕިއްޕާ" ހިމެނެ އެވެ.
އެކްޓިން އަށް ނުކުތް ފަހުން ބޮލީވުޑްގެ އިތުރުން އިންޓަނޭޝަނަލް ޕްރޮޖެކްޓްތަކުން ވެސް ފުރުސަތު ލިބެމުން އަންނަ ޒުވާން އެކްޓަރު ބުނީ އޭނަގެ ފިލްމީ ކެރިއަރާ މެދު ވަރަށް ހިތްހަމަޖެހޭ ކަމަށެވެ. އެކަމަކު އަދިވެސް ގިނަ ބަޔަކު އޭނަ ލޭބަލް ކުރަނީ ވަކި އެކްޓަރެއްގެ ބަދަލުގައި ޝާހިދުގެ ކޮއްކޮގެ ގޮތުގައި ކަމަށް ބުންޏެވެ.
"އެގޮތަށް އަބަދު ލޭބަލް ކުރިޔަސް އަހަންނަށް އެއްވެސް މައްސަލައެއް ވެސް ނެތް. އެކަމަކު ބުނެލަން އޮތީ އަހަންނަކީ ހަމަ ވަރަށް އިންޑެޕެންޑެންޓް އެކްޓަރެކޭ،" ބޮމްބޭ ޓައިމްސް އަދް ދިން އިންޓަވިއުއެއްގައި އިޝާން ބުންޏެވެ. "ނަމަވެސް ކޮންމެ މީހަކަށް ވެސް އެ މީހަކު ކުރާ މަސައްކަތެއްގެ ކާމިޔާބީން ލިބެންވާ ހައްގު ކްރެޑިޓާއި އޭގެ އުފާ ލިބިން ޖެހޭނެ. އަދި ބުނެލަން ބޭނުން ވަނީ އަހަންނަކީ އެއްވެސް މީހެއްގެ ހިޔަންޏެއް ވެސް ނޫނޭ."
އޭނަ ބުނީ ޝާހިދުގެ ކޮއްކޮ އަށްވާތީ ވަރަށް އުފާ ވެސް ކުރާ ކަމަށެވެ. އެކަމަކު އެއް އިރެއްގައި ވެސް ބޭބެއާ ވާދަކުރުމުގެ ވިސްނުމެއް ނުގެންގުޅޭ ކަމަށް ބުންޏެވެ.
"ބައެއް މީހުންނަށް ހީވެދާނެ އަހަރެމެން ދެ މީހުންގެ މެދުގައި ވާދަވެރި ކަމަށް އޮވެދާނޭ. އެކަމަކު އެކަހަލަ އެއްވެސް ކަހަލަ ކަމެއް ނެތް،" އިޝާން ބުންޏެވެ. "އަހަރެން އުފާކުރަން އަދި ފަހުރުވެރި ވެސް ޝާހިދު ކަހަލަ ކާމިޔާބު އެކްޓަރަކު ބޭބެއެއްގެ ގޮތުގައި ހުންނާތީ."
"އަ ސޫޓަބަލް ބޯއި" އާއި "ދަ ޕާފެކްޓް ކަޕްލް" ފަދަ އިންޓަނޭޝަނަލް ވެބް ސީރިޒްތަކުގައި ވެސް މަސައްކަތްކޮށްފައިވާ އިޝާންގެ ކުރިއަށް އޮތީ ވެސް ސީރީޒެކެވެ. އެއީ ނެޓްފްލިކްސްގެ "ދަ ރޯޔަލްސް" އެވެ.