އެމެރިކާގެ އަގުހެޔޮ އެއާލައިނެއް ކަމަށްވާ ސްޕިރިޓް އެއާލައިންގެ ދަރަނިތައް ބޮޑުވެ، އެ އެއާލައިން ބަނގުރޫޓްވެފައިވާކަން އިއުލާންކޮށްފި އެވެ.
މިކަން އިއުލާންކޮށް އެ އެއާލައިނުން މިއަދު ނެރުނު ބަޔާނެއްގައި ބުނީ ބަނގުރޫޓްވި ނަމަވެސް އޮޕަރޭޝަންތައް ހުއްޓާލަން ނިންމާފައި ނެތް ކަމަށެވެ. އެހެންވެ ކުރިއެކޭ އެއްގޮތަށް ސްޕިރިޓް އެއާލައިންގައު ދަތުރު ކުރަން ބޭނުންވާ މީހުންނަށް ބުކިންސް ހެދުމުގެ ފުރުސަތު އޮންނާނެ ކަމަށް ބުންޏެވެ.
އެ އެއާލައިނުން ބުނި ގޮތުގައި ދަރަނިތައް ރިސްޓްރަކްޗާ ކުރުމުގެ މަސައްކަތް ވެސް މިހާރު ވަނީ ފަށައިފަ އެވެ. އެއާލައިންގެ ދަރަނި 1.3 ބިލިއަން ޑޮލަރަށް އަރަ އެވެ. ކުންފުނީގެ ދަރަނިތައް ހަމައަކަށް އަޅުވެޅުމަށްޓަކައި ދަރަނި ދޫކޮށްފައިވާ ފަރާތްތަކާ މަޝްވަރާކޮށްގެން ދަރަނީގެ މުއާމަލާތްތައް ކުރިއަށް ގެންދެވޭނެ ފަސޭހަ ގޮތްތަކެއް ހޯދައި އަންނަ އަހަރުގެ ކުރީކޮޅު ކުންފުނީގެ މާލީ ހާލަތު ރަނގަޅު ކުރެވޭނެކަމުގެ އުންމީދު ވެސް ބޮޑު ކަމަށް ސްޕިރިޓް އެއާލައިނުން ބުންޏެވެ.
މި ފަހުން ސްޕިރިޓް އެއާލައިނުން ވަނީ އެހެން ދެ އެއާލައިނަކާ މާޖްކުރަން ވެސް މަސައްކަތްތަކެއްކޮށްފަ އެވެ. އެއީ ފްރޮންޓިއާ އެއާލައިނާއި ޖެޓްބްލޫ އެއާވޭސްއާ އެވެ. އެކަމަކު ގާނޫނީ ގޮތުން ކުރިމަތިވި ބައެއް ހުރަސްތަކާ ހެދި އެ މުއާމަލާތްތަކަށް މަގުފަހިވެފައެއް ނުވެ އެވެ.
ފްލީޓްގައި 241 ބޯޓް އޮތް ސްޕިރިޓް އެއާލައިން ދަތުރުތައް ކުރަނީ އެމެރިކާ އާއި ލެޓިން އެމެރިކާގެ އިތުރުން ކެރީބިއަންގެ ގައުމުތަކަށެވެ. އެގޮތުން އެ ސަރަހައްދުތަކުގެ 91 މަންޒިލަކަށް ޝެޑިއުލް ދަތުރުތައް ބާއްވަ އެވެ.
ސްޕިރިޓް އެއާލައިންގެ މުވައްޒަފުންގެ އަދަދު 11،000 އަށް ވުރެ ގިނަ އެވެ.
މި ފަހުން ބަނގުރޫޓްވުމާ ކުރިމަތިލާން ޖެހި ނަމަވެސް ފަހުން ކާމިޔާބުކަމާ އެކީ އެކަމުން އަރައިގަތް އެއާލައިންތަކުގެ ތެރޭގައި އެމެރިކަން އެއާލައިންސާއި ޔުނައިޓެޑް އެއާލައިންސްގެ އިތުރުން ޑެލްޓާ ހިމެނެ އެވެ.