ރިސޯޓުތަކަށް ލިބޭ ޑޮލަރު ރާއްޖޭގެ ބޭންކްތަކުން މާރުކުރަން ލާޒިމްކޮށް ހަދާފައިވާ ގަވާއިދު ބަދަލުނުކުރައްވާނެ ކަމަށް ވިދާޅުވެ، ރައީސް ޑރ. މުހައްމަދު މުއިއްޒު ދެއްކެވި ވާހަކަތަކަކީ އެމަނިކުފާނުގެ އިސްކޮޅާ ނުބައްދަލު ވާހަކަތަކެއް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ފްރޮންޓް އޮފީހުގެ ޖަލްސާގައި ރޭ ވާހަކަފުޅުދައްކަވަމުން ޔާމީން ވިދާޅުވީ އެމްއެމްއޭ އަކީ މުސްތަގިއްލު ވަކި ގާނޫނީ ޝަހުސެއް ކަމަށާއި އެމްއެމްއޭގެ ގަވާއިދެއްގެ ދަށުން ކުރާ ކަމެއް ބަދަލު ނުކުރައްވާނެ ކަމަށް ވިދާޅުވާއިރު، މިކަމާ ރައީސްއާ އޮތީ ކޮން ގުޅުމެއްތޯ ސުވާލު އުފެދޭ ކަމަށެވެ. އަދި އެމްއެމްއޭ ކުރާ ކަމެއް ބަދަލުނުކުރާނެ ވާހަކަ ރައީސް ވިދާޅުވުމަކީ ދެރަވަރު ކަމެއް ކަމަށާއި މިކަމުގައި ދައްކުވައިދެނީ ގާނޫނީ ކަންކަމުގައި އެއްވެސް ކަހަލަ ގާނޫނީ ލަފައެއް ހޯއްދެވުމެއް ނެތި ރައީސް މަސައްކަތް ކުރައްވާކަން ކަމަށް ޔާމީން ވިދާޅުވި އެވެ.
"ދެން ވެދާނެ ފަހަރުގައި އެއްވެ ތިބި މީހުން ފެނިފައި ޖަޒުބާތުގައި ވިދާޅުވެވުނީ ކަމަށް. އެއީ އެ ދައްކަވާ ވާހަކަފުޅަކީ އިސްކޮޅާއި ނުބައްދަލު ވާހަކަ އެ ދައްކަވަނީ،" ޔާމީން ވިދާޅުވި އެވެ.
ގާނޫނަށް ތަބާވާނެ ކަމަށް ވިދާޅުވެ ރައީސް މުއިއްޒު ދައްކަވަމުން ގެންދަވަނީ ރައީސަށް ސީދާ ބާރު ނުލިބޭ ކަމެއްގެ ތެރެއަށް އަތްބާނާ ވާހަކަ ކަމަށްވެސް ޔާމީން ވިދާޅުވި އެވެ. އަދި ރައީސް މުއިއްޒު ބޮޑެތި ވަފުދުތަކާއެކު ބޭރު ގައުމުތަކަށް ގިނަގިނައިން ވަޑައިގަންނަވާތީ އެކަމާ ކަންބޮޑުވުން ފާޅުކުރައްވައި ޔާމީން ވަނީ ސަރުކާރުން ޑޮލަރު ހޯދަން އުޅެނީ މިފަދަ ދަތުރުތަކަށް ހަރަދު ކުރަން ކަމަށްވެސް ވިދާޅުވެފަ އެވެ.
ސަރުކާރަށް ވަންނަ ޑޮލަރުގެ ނިސްބަތް މަދު ނުވާ ކަމަށާއި ނަމަވެސް އެމްޑީޕީ ސަރުކާރު ނިންމާލިއިރު ހުރިވަރާއި ކައިރި އަށް ވެސް މި ސަރުކާރުގެ ފުރަތަމަ އަހަރުތެރޭ ޕީއެސްއައިޕީ މަޝްރޫއުތައް ނުހިނގާ ކަމަށް ޔާމީން ވިދާޅުވި އެވެ. އަދި ދައުލަތަށް މިއަހަރު ލިބުނު ޑޮލަރުން ރައްޔިތުންގެ ބޭނުމަށް ހޭދަކުރީ ކިހާ ވަރެއްކަން ރައްޔިތުންނަށް ހާމަކޮށްދިނުމަށް ޔާމީން ވަނީ ސަރުކާރަށް ގޮވާލާފަ އެވެ.