މުޖުތަމައުގެ ސަލާމަތާއި ރައްކާތެރިކަން ނަގާލަމުންދާ ގޭންގުތައް އެއްކޮށް ހުއްޓުވާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
އިހުސާން "އެސްއެސް ޓީވީ" އަށް ދެއްވި އިންޓަވިއުއެއްގައި ވިދާޅުވީ ރާއްޖޭގައި ނަން މަޝްހޫރުވެގެން މުޖުތަމައުގެ ސަލާމަތާއި ރައްކާތެރިކަން ނަގާލަމުންދާ ގޭންގުތަކުގެ ކަންތައްތައް އެއްކޮށް ހުއްޓުވާނެ ކަމަށެވެ.
"މަދެއް ވެސް ނޫން، އެއްކޮށް ހުއްޓުވާނަން. އެކަމުގެ 100 ޕަސެންޓް ޔަގީންކަން އެބައޮތް،" އިހުސާން ވިދާޅުވި އެވެ.
އިހުސާން ވިދާޅުވީ މިކަން ކުރުމުގެ ހިތްވަރު ރައީސް ޑރ. މުހައްމަދު މުއިއްޒުގެ ކިބައިގައި އެބަ ހުންނެވި ކަމަށާއި ރައީސްގެ ނިންމުންތައް ތަންފީޒުކުރަން ހޯމް މިނިސްޓްރީންނާއި ފުލުހުން މަސައްކަތް ކުރާނެ ކަމަށެވެ. އަދި މިކަން ރާއްޖެއިން ހައްލުކުރެވޭނެ ކަމާމެދު ޝައްކެއް ނެތް ކަމަށްވެސް ވިދާޅުވި އެވެ.
ރާއްޖޭގައި ގޭންގުތަކުގެ ބާރު ގަދަވެގެން ގޮސްފައިވަނީ ކުރީގެ ސަރުކާރުތަކުން މިކަމަށް އެއްބާރުލުން ދެވިފައި އޮތުމުން ކަމަށާއި އެކަމާ ދެކޮޅަށް ފިޔަވަޅު އަޅަން ކުރީގެ ސަރުކާރުތަކުން ވިސްނިނަމަ މިވަރަށް ގޭންގުތަކުގެ ކަންތައްތައް ފުޅާވެގެން ނުދާނެ ކަމަށްވެސް އިހުސާން ވިދާޅުވި އެވެ.
މިކަމުގައި މި ސަރުކާރުން ފިޔަވަޅުތައް އަޅާނެ ކަމަށާއި ރައީސް މުއިއްޒު މިކަން ހައްލުކުރައްވާނެ ކަމުގެ ޔަގީންކަން އެބައޮތް ކަމަށްވެސް އޭނާ ވިދާޅުވި އެވެ.