ޗައިނާގެ ކުންފުނި ވާވޭގެ "މޭޓް 70" ފޯނު ސީރީޒްގެ ޕްރީ-އޯރަކަށް ހުޅުވާލައިފި އެވެ.
އިއްޔެ އިން ފެށިގެން ފޯނަށް ދުރާލައި އޯޑަރު ކުރަން ހުޅުވައިލި ނަމަވެސް ފޯނު ވިއްކާނެ އަގުތައް ހާމަކޮށްފައެއް ނުވެ އެވެ. އެކަމަކު މި މަހުގެ 26 ވަނަ ދުވަހު "މޭޓް 70" އަށް ހާއްސަ އިވެންޓެއް އޮންނާނެކަން ވާވޭ އިން ބުންޏެވެ.
އެހެންވެ އެ އިވެންޓްގައި ފޯނުތައް ދައްކާލައި، އިތުރު މައުލޫމާތުތައް ފޯރުކޮށް ދޭނެ ކަމަށް ބެލެވެ އެވެ. އެގޮތުން "މޭޓް 70" ގެ ހަތަރު މޮޑެލްއެއް ނެރޭނެ ކަމަށް ބެލެވެ އެވެ.
ދުވަސްތަކެއްގެ މެދުކެނޑުމަކަށް ފަހު ވާވޭ 5ޖީ ޕްރީމިއަމް ސްމާޓްފޯނުގެ ވިޔަފާރި އަށް އެނބުރި އައީ މިދިޔަ އަހަރު އެވެ. އެގޮތުން އެންމެ ފަހުން ނެރެފައި ވަނީ "މޭޓް 60" އެވެ. އެ ސީރީޒްގެ ހަތަރު މޮޑެލްއެއް ނެރެފައިވެ އެވެ. އެއީ މޭޓް 60، މޭޓް 60 ޕްރޯ އާއި މޭޓް 60 ޕްރޯ ޕްލަސްގެ އިތުރުން މޭޓް 60 އާރްއެސް އެވެ.