ފަރުހާން އަޚްތަރު އެކްޓަރެއްގެ ގޮތުގައި މިހާރު މަސައްކަތް ކުރަމުން އަންނަ އާ ފިލްމު "120 ބަހާދޫރު" އަންނަ އަހަރު ގެނެސްދޭނެކަން އިއުލާންކޮށް، އޭގެ އާ ޕޯސްޓަރެއް ވެސް ދައްކާލައިފި އެވެ.
މިދިޔަ ސެޕްޓެމްބަރު މަހުގެ ތެރޭގައި ޝޫޓިން ފެށި މި ފިލްމަކީ އިންޑިއާ އާއި ޗައިނާއާ ދެމެދު 1962 ގައި ކުރި ރެޒާންގް ލާ ހަނގުރާމަ އަށް ބިނާކޮށް ހަދާ ފިލްމެކެވެ. އިންޑިއާގެ 120 އޮފިސަރުން ޗައިނާގެ 3،000 ސިފައިންދ ދެކޮޅަށް ކުރި ހަނގުރާމަ ދައްކުވައި ދޭ "120 ބަހާދޫރު" ގައި ފަރުހާން ކުޅެނީ އެ ހަނގުރާމައިގައި އިންޑިއާގެ އަސްކަރިއްޔާގެ ލީޑަރަކަށް ހުރި މޭޖާ ޝައިތާން ސިންގް ބާޓީގެ ރޯލެވެ.
މި ފިލްމުގެ ޑައިރެކްޓަރަކީ ޑައިރެކްޓަރަކީ 2022 ގައި ރިލީޒްކުރި ކަންގަނާ ރަނވަތުގެ އެކްޝަން ތުރިލާ "ދާކަޅް" ގެނެސްދިން ރަޒްނީޝް ރާއީ ގާއީ އެވެ.
"120 ބަހާދޫރު" އަންނަ އަހަރު ގެނެސްދޭނެކަން އިއުލާންކުރި ނަމަވެސް ފިލްމު ސިނަމާތަކަށް ގެންނާނެ ސީދާ ތާރީހެއް އަދި ހާމައެއް ނުކުރެ އެވެ.
އެކްސަލް އެންޓަޓައިންމަންޓްގެ ނަމުގައި ޕްރޮޑަކްޝަން ހައުސްއެއް ހިންގަމުން އަންނަ ފަރުހާން އެންމެ ފަހުން ކުޅުނު ފިލްމަކީ 2021 ގެ "ތޫފާން" އެވެ.
ޑައިރެކްޓަރެއްގެ ގޮތުގައި މަޝްހޫރުވި ފަންނާނު އާ ފިލްމެއް ކުޅެން ފެށީ، ޑައިރެކްޓްކުރަން ދެ ފިލްމެއް އިއުލާންކޮށްފައި އޮތްވަ އެވެ. އެއީ 2021 ގައި އިއުލާންކުރި "ޖީ ލޭ ޒަރާ" އާއި މިދިޔަ އަހަރު އިއުލާންކުރި "ޑޮން 3" އެވެ. ފަރުހާން ޑައިރެކްޝަނަށް ނުކުތީ 2001 ގެ "ދިލް ޗާތާ ހޭ" އިންނެވެ. އޭގެ ފަހުން އޭނަ ޑައިރެކްޓްކުރި ފިލްމުތަކަކީ 2004 ގެ "ލަކްޝް" އާއި 2006 ގެ "ޑޮން" އަދި 2011 ގެ "ޑޮން 2" އެވެ.