ގައުމީ އެއާލައިން މޯލްޑިވިއަން އޮޕަރޭޓް ކުރާ ކުންފުނި، އައިލެންޑް އޭވިއޭޝަން ސާވިސް (އައިއޭއެސް) ކުރީގެ ޑެޕިއުޓީ މެނޭޖިން ޑިރެކްޓަރުގެ މަގާމުން އައިޝަތު ޖެނިފާ ވަކިކުރީ ގާނޫނާ ހިލާފަށް ކަމަށް ނިންމައި، އޭނާ އަށް އަލުން ވަޒީފާ ދިނުމަށާއި ވަޒީފާ ބަދަލު ދޭން ވަޒީފާއާ ބެހޭ ޓްރައިބިއުނަލުން ކުރި އަމުރު ހައި ކޯޓުގައި އިސްތިއުނާފުކޮށްފި އެވެ.
އެ މައްސަލަ އައިއޭއެސް އިން ހައި ކޯޓަށް ހުށަހެޅީ މިދިޔަ ހަފުތާ އަންގާރަ ދުވަހު އެވެ. އެކަމަކު މައްސަލަ ބަލައިގަތުމާ މެދު ކޯޓުން އަދި ގޮތެއް ނުނިންމަ އެވެ.
އައިއޭއެސްގެ ޑީއެމްޑީއަކަށް ޖެނިފާ އައްޔަންކުރީ ޑިސެމްބަރު 2018 ގަ އެވެ. އޭނަ މަގާމުން ވަކިކުތީ މި އަހަރުގެ ޖެނުއަރީ މަހު އެވެ.
އެ މައްސަލަ ޖެނިފާގެ ފަރާތުން ވަޒީފާއާ ބެހޭ ޓްރައިބިއުނަލަށް ހުށަހެޅުމުން، އެ ޓްރައިބިއުނަލުން ނިންމީ ޖެނިފާ މަގާމުން ވަކިކުރީ ވަޒީފާ އިން ވަކިކުރަން ޖެހޭ ފަދަ ހާލަތެއް މެދުވެރިވެގެން ނޫން ކަމަށާއި އޭނާ ވަކިކުރީ މައުޟޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމުކުރުމެއް ނެތި ކަމަށެވެ. އެހެންވެ އަލުން ވަޒީފާ ދިނުމަށާއި މައްސަލަ ނިމުނު މުއްދަތާ ހަމައަށް ލިބެން ޖެހޭ މުސާރަ އާއި އިނާޔަތްތައް ވެސް ދޭން ޓްރިބިއުނަލް އިން ނިންމި އެވެ.
ޓްރައިބިއުނަލް ބުނެފައި ވަނީ އެ ނިންމުން މަސް ދުވަސް ތެރޭގައި ތަންފީޒުކޮށް އެކަން އެތަނަށް އަންގަން ވެސް ޖެހޭނެ ކަމަށެވެ.