އަންނަ މަހު ރިލީޒްކުރަން ހަމަޖެހިފައިވާ ވަރޫން ދަވަންގެ "ބޭބީ ޖޯން" އިން ބޮލީވުޑަށް ތައާރަފުވާ ދެކުނުގެ މަޝްހޫރު ބަތަލާ ކީރްތީ ސުރޭޝް އަންނަ މަހު ކައިވެނި ކުރަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ 32 އަހަރުގެ ބަތަލާ އާއި އޭނަގެ ޒަމާންވީ ލޯބިވެރިޔާ އެންތަނީ ތައްޓިލް ކައިވެނި ކުރަން ހަމަޖެހިފައި ވަނީ އަންނަ މަހުގެ 11 ނުވަތަ 12 ގައި ގޯއާގައި ކަމަށެވެ. އެކީގައި ހައި ސްކޫލްގައި ކިޔެވި ކީރްތީ އާއި އެންތަނީ ރައްޓެހިވެގެން އުޅޭތާ 15 އަހަރުވެފައިވާ ކަމަށް މީޑިއާތަކުން ބުނެ އެވެ.
ދެހާސް އަށާރައިގެ ފިލްމު "މަހާނަތީ" ކުޅެގެން އެންމެ މޮޅު ބަތަލާގެ ނެޝަނަލް އެވޯޑް ވެސް ހޯދާފައިވާ ކިރްތީ އަކީ އިންޑިއާގެ ދެކުނު ފިލްމުގެ އިންޑަސްޓްރީގެ މިހާރުގެ އެންމެ ކާމިޔާބު އެއް ބަތަލާ އެވެ. އޭނަ އާންމުކޮށް ކުޅެނީ، ތެލެތޫ، ތަމަޅަ އަދި މަލަޔާޅަމް ފިލްމުތަކެވެ.
ކީރްތީ އެންމެ ފަހުން ފެނިފައި ވަނީ އޮގަސްޓްގައި ރިލީޒްކުރި ތަމަޅަ ޕޮލިޓިކަލް ކޮމެޑީ "ރަގޫ ތާތާ" އިންނެވެ.