ތައިލޭންޑާއި ޔުނައިޓެޑް އަރަބް އެމިރޭޓްސް (ޔޫއޭއީ) އިން އާސަންދައިގެ ދަށުން ބޭސްފަރުވާ ކުރެވޭނެ ދުވަހެއް ވަރަށް އަވަހަށް ހާމަކުރާނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ސީއީއޯ ހީނާ ވަލީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިޖުތިމާއީ ކޮމިޓީގައި މިއަދު އޭނަނާ ވިދާޅުވީ، ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް އެ ދެ ގައުމުން އާސަންދައިގެ ހިދުމަތް ފޯރުކޮށްދީ އެ ވައުދު ފުއްދަވާނެ ކަމަށެވެ.
ހިނާ ވިދާޅުވީ ތައިލޭންޑާއި ޔޫއޭއީން އާސަންދަ މެދުވެރިކޮށް ފަރުވާ ހޯދޭނެ އިންތިޒާމުތައް ހަމަޖެއްސުމާ ގުޅޭ ގޮތުން ދެ ގައުމުގެ ހޮސްޕިޓަލްތަކާ އެކު މަޝްވަރާކޮށް، ކުރިއަށް ދެވޭނެ ގޮތެއް ހޯދާފައިވާ ކަމަށެވެ.
"އަޅުގަނޑުމެންނަށް ބަޔަކާ އެކީގައި ކުރިއަށް ދެވޭނެ ހިސާބަށް ވާސިލުވެފައި އެބަވޭ،" އޭނަ ވިދާޅުވި އެވެ. "އެހެންވީމާ އެ ހިދުމަތް ދެވޭނެ ދުވަހަކާ އެކަމާ ބެހޭ އިތުރު ތަފުސީލުތައް އަޅުގަނޑުމެން ވަރަށް އަވަހަށް ހާމަ ކުރާނަން."
ތައިލެންޑާއި ޔޫއޭއީ އަށް އާސަންދަ ފުޅާކުރުމަށް ނިންމަވައި، އެކަން ރައީސް އިއުލާން ކުރައްވާފައިވަނީ މިދިޔަ ޖެނުއަރީ މަހުގެ ތެރޭގަ އެވެ.