ކާމިޔާބު އެތައް ފިލްމެއް ގެނެސްދީފައިވާ ބޮލީވުޑްގެ ޑައިރެކްޓަރު ރާކޭޝް ރޯޝަން ދެން ފިލްމު ޑައިރެކްޓް ނުކުރާނެކަން އިއުލާންކޮށްފި އެވެ.
މީޑިއާއަކަށް ދިން އިންޓަވިއުއެއްގައި މިކަން ހާމަކޮށް މަޝްހޫރު އެކްޓަރު ރިތިކް ރޯޝަންގެ ބައްޕަ ބުނީ އޭނަގެ ޒަމާން މިހާރު ގޮއްސި ކަމަށް ގަބޫލުކުރާ ކަމަށާއި ދެން ޑައިރެކްޓްކުރެވޭނެ ކަމަށް ގަބޫލު ވެސް ނުކުރާ ކަމަށެވެ. އެކަމަކު ފިލްމު ޕްރޮޑިއުސްކުރުމުގެ މަސައްކަތުގައި ދެމިހުންނާނެ ކަމަށް ފިލްމްކްރާފްޓް ޕްރޮޑަކްޝަންސްގެ ނަމުގައި އަމިއްލަ ސްޓޫޑިއޯއެއް ހިންގަމުން އަންނަ ރާކޭޝް 75 ބުންޏެވެ.
"ޑައިރެކްޝަނާ އަހަރެން ދުރުވި ނަމަވެސް ވަރަށް އަވަހަށް ކްރިޝްގެ ހަތަރު ވަނަ ބައި އިއުލާން ކުރާނަން." އޭނަ ބުންޏެވެ.
ދެހާސް ވަނަ އަހަރުގެ ބޮޑު ހިޓް "ކަހޯ ނާ…ޕިޔާރު ހޭ" އިން ރިތިކް ބޮލީވުޑަށް ނެރުނު ފަހުން ދަރިފުޅު ހިމަނައިގެން ފިލްމު ހަދަމުން އައި ރާކޭޝްގެ އެންމެ ފަހުގެ ޑައިރެކްޝަނަކީ އޭނަގެ ގެނެސްދޭން ފަށާފައި އޮތް ސުޕަހީރޯ ޕްރެންޗައިޒް "ކްރިޝް" ގެ ތިން ވަނަ އެވެ. އެ ފިލްމު ރިލީޒްކުރީ 2013 ގަ އެވެ.
ރާކޭޝް ޑައިރެކްޓްކުރި މަގުބޫލު ފިލްމުތަކުގެ ތެރޭގައި "ހޫން ބާރީ މާންގް"، "ކަރަން އަރުޖުން"، "ކޮއިލާ" އަދި "ކޮއި…މިލް ގަޔާ" ހިމެނެ އެވެ.
ފިލްމީ އާއިލާއަކަށް ނިސްބަތްވާ ރާކޭޝް އަކީ 1970 އާއި 1980 ގެ ތެރޭގައި ފިލްމު ވެސް ކުޅުނު މީހެކެވެ.