މެންޗެސްޓާ ސިޓީގެ ކޯޗު ޕެޕް ގާޑިއޯލާ އެ ކްލަބުގައި އިތުރު އެއް އަހަރަށް މަޑުކުރަން ނިންމައިފި އެވެ.
ގާޑިއޯލާ ،53، ސިޓީއާއެކު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. ރިޕޯޓުތައް ބުނާގޮތުން ގާޑިއޯލާ މިހާރު ވަނީ ސިޓީއާއެކު ހަދާފައިވާ ކޮންޓްރެކްޓް އިތުރު އެއް އަހަރަށް އާކުރަން ނިންމާފަ އެވެ.
ސްޕެއިނަށް އުފަން ގާޑިއޯލާ ސިޓީއާ ގުޅުނީ 2016 ވަނަ އަހަރު އެވެ. އޭނާގެ އިރުޝާދުގެ ދަށުން ކުޅެ ސިޓީން މިހާތަނަށް ވަނީ 18 ތަށްޓެއް ކާމިޔާބުކޮށްފަ އެވެ. އޭގެތެރޭގައި ހަ ޕްރިމިއާ ލީގު ތަށި ހިމެނެ އެވެ.
ގާޑިއޯލާގެ އިރުޝާދުގެ ދަށުން ކުޅެ ސިޓީން ފުރަތަމަ ފަހަރަށް ވަނީ އެ ކްލަބުގެ ތާރީހުގައި ޗެމްޕިއަންސް ލީގު ވެސް ކާމިޔާބުކޮށްފަ އެވެ. އަދި އެއް ސީޒަނެއްގައި ތިން ތަށި ހޯދި ދެވަނަ އިނގިރޭސި ޓީމުގެ ޝަރަފު ވެސް ގާޑިއޯލާ ވަނީ ސިޓީ އަށް ހޯދާދީފަ އެވެ.
މީގެއިތުރުން ސިޓީ އަކީ ޖެހިޖެހިގެން ހަތަރު ޕްރިމިއާ ލީގު ތަށި ހޯދި ފުރަތަމަ ކްލަބު ކަމަށްވާއިރު، ސިޓީ އަކީ އެއް ސީޒަނެއްގައި 100 ޕޮއިންޓު ހަމަކުރި ފުރަތަމަ ކްލަބު ވެސް މެ އެވެ.