ރާއްޖޭގެ ރައީސްކަން ކުރެއްވުމުގެ ޝައުގުވެރިކަން އެބަހުރި ކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެ އެވެ.
މަޖިލީހުގެ މެންބަރުކަމާއި މިނިސްޓަރުކަން ވެސް ކުރައްވާފައިިވާ ފައްޔާޒް "އަދަދު" ނޫހަށް ދެއްވި އިންޓަވިއުއެއްގައި ވިދާޅުވީ ވެރިކަމަށް ވަޑައިގެންނެވުމުގެ ޝައުގުވެރިކަން ހުރި ނަމަވެސް 2028 ގެ ރިޔާސީ އިންތިހާބުގައި ވާދަކުރުމާމެދު މިހާތަނަށް ގޮތެއް ނުނިންމާ ކަމަށެވެ.
މިއީ ވެރިކަމަށް ވަޑައިގެންނެވުމުގެ ޝައުގުވެރިކަން އޮތް ވާހަކަ އޭނަ ވިދާޅުވި ފުރަތަމަ ފަހަރެވެ.
"ވަރަށް ގިނަ ބޭފުޅުން ވިދާޅުވާނެ ތިމަންނާ އެކަހަލަ އިންޓްރެސްޓެއް ނެތޭ އެނގޭތޯ. އަޅުގަނޑުގެ އިންޓްރެސްޓް އެބަހުރި،" ފައްޔާޒް ވިދާޅުވި އެވެ. "އެކަމަކު އޭގެ މާނައަކީ ދެހާސް އަށާވީހުގައި އެކަން ކުރަން ނިންމައިގެން އަޅުގަނޑު ހުރި ވާހަކައެއް ނޫން."
އޭނަ ވިދާޅުވީ މިވަގުތު މަސައްކަތް ކުރަމުން އަންނަނީ 2028 އާ ހަމައަށް މިހާރު އޮތް ސަރުކާރު ގާނޫނީ އިމުގެ ތެރެއިން ބަލި ކުރެވޭނެ ގޮތަކަށް ކަމަށެވެ. އަދި އެ މަގު ނުހޯދިއްޖެ ނަމަ ރައްޔިތުންނަށް މި ގައުމުގައި ނޫޅެވޭނެ ކަމަށް ވިދާޅުވި އެވެ.
"އަޅުގަނޑު މިވަގުތު ބަލަމުން މިދަނީ އެންމެ މުހިންމު ކަމަކަށް މިހާރު މިއޮތް ސަރުކާރު ބަލި ކުރެވޭނެ ގޮތެއް ދެހާސް އަށާވީހާއާ ހިސާބުން ވެސް އަދި އޭގެ ކުރިން ވިޔަސް ގާނޫނީ އިމުގެ ތެރެއިން ވެއްޖެއްޔާ ބަލި ކުރެވޭނެ ގޮތެއް ނުހޯދައިފި ކަމަށްވަންޏާމުން އަޅުގަނޑުމެންނަށް ރައްޔިތުންގެ މިނިވަންކަމާ އެއްކޮށްނެއް ދިވެހިރާއްޖެ ކުރިއަށް ދާ ތަނެއް އަޅުގަނޑަކަށް ނުފެނޭ." ފައްޔާޒް ވިދާޅުވި އެވެ.
ޕާޓީގެ ލީޑަރެއްގެ ހައިސިއްޔަތުން މިހާރު ކުރަމުންދާ އެންމެ މުހިންމު އެއް މަސައްކަތަކީ 2028 ގައި އެމްޑީޕީއަށް ވެރިކަން ހޯދައި ދިނުން ކަމަށް އޭނަ ވިދާޅުވި އެވެ. އެގޮތުން ކެންޑިޑެންސީއާ ހިސާބަށް ދާއިރު ޕާޓީ އަށް ފެންނަ އެންމެ ރަނގަޅު ކެންޑިޑޭޓެއް ހޮވައި އެކަން ރަނގަޅަށް ކުރިއަށް ގެންދާނެ ކަމަށް ވިދާޅުވި އެވެ.
"އަޅުގަނޑު ދެކޭ ގޮތުގައި ޑިމޮކްރަސީގެ މަގުގައި އެމްޑީޕީ ވެސް ދިވެހިރާއްޖެ ވެސް ކުރިއަށްދާ ކަމަށްވާ ނަމަ، ވަކި މީހަކަށް ބަރޯސާވެގެން އޮންނަ އޮތުމަށް ވުރެ ސިޔާސަތުތަކަކަށް ބަރޯސާވާން މި ޖެހެނީ،' އޭނަ ވިދާޅުވި އެވެ. "އެހެންވީމަ އެގޮތަށް ޕާޓީ ބަދަލުވާތަން ފެންނަމުން މިދަނީ."
މިދިޔަ އަހަރު ބޭއްވި ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރެއްވީ ކުރީގެ ރައީސް އިބްރާހީމް މުހައްމަދު ސޯލިހެވެ. އެކަމަކު 2028 ގައި ނުކުންނެވުމާ މެދު އެ މަނިކުފާނު ވެސް އަދި ގޮތެއް ނުނިންމަވަ އެވެ.